Konsey Lafanmiy i diskit nouvo sours finansman pour bann proze


19-March-2013

Msye Vel pe anim sesyon Sanmdi


Sa ti pandan en sesyon ki ti deroul kot Sant Kiltirel Nasyonal Sanmdi. Se Benjamin Vel, en konsiltan lokal, ki ti anim sa sesyon.

Dan son prezantasyon, Msye Vel ti montre sa bann partisipan bann diferan landrwa ek lorganizasyon ki zot kapab al rod led finansyel avek e ki fason zot kapab fer sa prosedir.

Tyermenn sa konsey, Robert Moumou, i dir ki konsey i en brans anba departman devlopman kominoter me ki bann prosedir pe ganny fer pour li vin en manm Liaison Unit for Non-Governmental Organisations (Lungos).

I ti dir ki sa i a fer li pli fasil pour zot kapab ganny finansman pour bann proze avek bann lorganizasyon lokal e enternasyonal ki afilye avek Lungos.

Msye Moumou ti dir ki zot in reisi fer serten proze me zot santi ki bokou plis i kapab ganny fer ki pou ede aport zot kontribisyon dan progranm renesans sosyal.
I ti fer resorti ki bann proze ki pou ganny fer pour depan lo konsern ek nesesite bann diferan distrik.

Msye Moumou ti dir ki pour le moman konsey i annan selman 14 komite ki aktiv dan bann distrik me konsey pe travay lo en plan pour etablir lezot komite e fer marse dan bann lezot distrik.
Pandan sa sesyon, bann manm ki ti prezan ti ganny sans enterakte, partaz nide e sizesyon e met serten konsern devan.

Print