Let pour Editer-Ki plan Mer Victoria pour lavil?


27-March-2013

Sa i konsern lofis ‘Mer Victoria’ ki responsab pour lavil. Nou bann rezidan dan rezyon lavil Victoria, nou ti a kontan konnen ki plan i annan pour sa lannen pour Victoria.

Nou mazinen ki lofis Mer Victoria pe travay lo bann proze lanbelisman ek animasyon pour lavil, me malerezman nou pa tann nanryen lo sa size.

Nou panse ki anplis ki bann aktivite ki deroul dan bann landrwa parey ‘Pirates Arms’, ‘Amusement Centre’, Stad Popiler, Zarden Zanfan e dan bazar Victoria ki fek rekonmanse, i merit annan lezot form animasyon dan lavil.

Dan sa konteks, nou ti a kontan ganny enformen lo progranm biro Mer Victoria e met nou okouran lo sa ki i anvizaze fer dan sa direksyon dan lavenir.

An esperan ki lotorite ava pran sa pwen an konsiderasyon, nou ofer zot tou nou lankourazman dan zot travay.
Mersi bokou

Benjamine Socrate (Madanm)

Print