Lakres Les Mamelles i ganny rekonpanse pour bon rezilta


06-June-2013

Bann zanfan ek envite dan en portre souvenir pour mark sa lokazyon

Prezan dan sa lasanble kot lakres Les Mamelles Vandredi pase ti manm Lasanble Nasyonal sa distrik, Msye Emmanuel Fideria, ladministrater distrik Madanm Doris Kiwale, group lafanmir, group lazenes e group brigad, travayer sa lekol, paran ek bann zelev.

Se Msye Fideria ki ti prezant bann zelev sa lekol avek en home theatre konman kado pour bon rezilta dan legzanmen ‘Aprann lir avek Papiyon’ ki ganny drafte par Minister Ledikasyon lannenn pase.

Madanm Kiwale i dir ki zot pe anvize fer sak laklas ganny son prop home theatre vi ki sa progranm ‘Aprann lir avek Papiyon’ i servi bokou odyo pour fer zanfan aprann.

Madanm Kiwale ti fer en mansyon spesyal ek bann zanfan pour bann nouvo ban ki distrik ti donn lekol. Sa bann ban in ganny enstale dan lari lekol anba bann pye dibwa, kot zanfan i kapab asize dan lonbraz dan letan rekreasyon.

Madanm Kiwale ti met zanfan dan plis lazwa ler i ti anons zot ki zot pe ganny en gato sorti kot Chilli Bar pour zot lafet.

Print