Mouvman Zenn Sitwayen i reflekte lo tenm nasyonal-Lekol English River i ranport premye pri


05-July-2013

Lekip gannyan sorti Lekol English River

Se Konsey Nasyonal Sesel pour bann zenn (SNYC) ki ti sa semenn organiz sa deliberasyon. Sa i dezyenm deliberasyon apre ki premye sesyon ki ti fer lannen pase ti en sikse. Bann partisipan ti annan konm tenm ‘Rekonnet valer e nesesite pour etidye e sezi tou loportinite ki a nou dispozisyon’.

Sa tenm i an relasyon avek tenm nasyonal pour lannen 2013 ‘Travay dir pour nou Sesel’.

Ti annan set lekol ki ti pran par dan sa konpetisyon. Parmi bann pwen pertinan ki sa bann etidyan ti fer resorti ti lenportans travay dir lekol, ankouraz ansenyan pour kontiyen dan sa profesyon e averti tou zenn pour sezi loportinite ki a zot dispozisyon. 

Premye pri ti al pour lekol English River ki ti fer en deliberasyon remarkab lo zefor ki gouvernman pe mete pour ofer tou zenn sa loportinite pour etidye e avanse. Zot ti fer resorti ki i responsabilite sak endividi pour servi sa bann sans. Dezyenm pozisyon ti al pour lekol Anse Royale segonder swivi par lekol Plaisance segonder dan trwazyenm pozisyon. Bann gannyan ti resevwar pri e tou lekol ti ganny en sertifika partisipasyon.  

Prosen rankont pour bann zenn i Sanmdi le 27 Zilyet kot Palais des Sport, Roche Caïman. Sa i pour en konpetisyon sportif ki ganny fer tou le lannen.

Print