Follow us on:

Facebook Twitter LinkedIn YouTube

Domestic

Lasanble i konmans deba lo Kod Sivil Sesel | 11 September 2019

Lasanble Nasyonal ti yer vote 25 anfaver e personn kont lo prensip e merit zeneral en prozedlwa ki letan i ganny aprouve pou ranplas Kod Sivil ki an fors depi 1975.

Sete Minis pour Lasante Msye Jean Paul Adam ki ti prezant sa prozedlwa lo Kod Sivil Sesel devan Lasanble lo lapar Vis Prezidan Vincent Meriton. I ti fer resorti dan son prezantasyon ki menm si Kod Sivil Sesel ti vin anfors an 1975 i reflekte an gran parti Kod Napoleonik ki ti dan peryod Franse an 1804.

«Sesel i en pei modern e nou bann lalwa i bezwen osi vin modern pour reflekte kalite sosyete ki nou pe viv ladan aktyelman,» Minis Adam ti dir.

En Kod Sivil i bann lalwa ki regilariz bann tranzaksyon ant dimoun dan zot lavi toulezour depi nesans ziska lanmor. Sa i enkli lalwa lo kontra, propriyete, lobligasyon anver vwazen, maryaz, ki mannyer pour partaz later, pour ki en paran i kit son leritaz, drwa zanfan ilezitim pour erit byen son paran parmi lezot pwen ankor.

Vi kantite topik, anviron 16 ki pou bezwen lamanman, i nesesit en nouvo lalwa e demars pour fer sa travay ti komanse par Bills Committee dan Lasanble Nasyonal depi an Zilyet lannen pase e depi sa in annan bann diskisyon ek konsiltasyon lo sa bann diferan topik sansib, kontrovers e kontansye ki’n deza mansyonnen pli o. Sa komite in ganny lasistans plizyer o personalite dan sa demars parey Msye Bernard Georges ki diriz sa komite limenm en avoka par profesyon e osi profeser Anthony Angelo, konsiltan lalwa pour zidisyer parmi lezot ankor.

Yer tou bann manm Lasanble ki ti pran laparol ti koz lo lenportans sa lalwa pour popilasyon e kantite lentere ki in zenere akoz i konsern nou tou e dimoun i vwar zot ladan atraver bann sirkonstans lavi ki zot pas ladan e bezwen al ankour pour rod lazistis.

Bann manm in osi demande ki zot ganny tou letan neseser pour get bann lamannman ki pe ganny fer avek bokou prekosyon pour asire ki nou pei i ganny en bon Kod Sivil ki pou pran an kont realite lavi ozordi.

Lo son, kote dirizan lopozisyon Wavel Ramkalawan in propoze ki lezot o personalite dan lalwa Sesel i zwenn zot dan zot deliberasyon pour anrisir deba avek leksperyans Seselwa akoz se zot ki al devan lakour pour argimant e defann nou bann sitwayen dan bann diferan ka.

Deba lo Kod Sivil pou al dan staz komite komansman ozordi e bann deba i ekspekte al pour plizyer zour.

More news