Follow us on:

Facebook Twitter LinkedIn YouTube

National Assembly

Lasanble i rod detay lo rezon akoz prizonnyen in ganny retire vitman Coetivy |28 September 2019

Pour permet ki lanket ki Lotorite Prizon ek Lapolis pe fer dan diferan aktivite ilegal, labi ki ti pe deroule lo Coetivy, in fer ki Lotorite Prizon in bezwen retir tou sa 18 prizonnyen e mazorite son travayer lo zil Coetivy.

Se Minis responsab pour Zafer Entern, Lazenes, Spor ek Kiltir, Madanm Macsuzy Mondon ki ti dir sa dan Lasanble Nasyonal Zedi apremidi letan i ti pe reponn en kestyon notis prive par dirizan lopozisyon Msye Wavel Ramkalawan.

Minis Mondon ti eksplike ki ti le 9 Out ki Lotorite Prizon ti fer resorti dan en kominike lapres ki in transfer bann kondannen ki ti laba ansanm avek detrwa son bann anplwaye Prizon Montagne Posée.

Sa kominike ti dir ki sa ti avek bi pour revwar e reevalye loperasyon ek progranm pour bann prizonnyen lo sa zil apre serten lenformasyon ki Lotorite Prizon ti’n resevwar.

Minis Mondon i dir ki ziska prezan Lotorite Prizon pa ankor retir okenn son bann asset e ki i ankor annan detrwa anplwaye lo sa zil.

An sa ki konsern sa bann aktivite ilegal, labi oubyen bann breach sekirite, Minis Mondon in dir i annan enpe letan depi ki Lotorite Prizon pe travay konzwentman avek Lapolis e in annan detrwa loperasyon ki’n ganny fer me lanket i ankor pe kontinyen.

I dir i osi annan serten mezir ki’n ganny pran par Lotorite Prizon ek IDC antretan ki lanket pe kontinyen.

Minis Mondon in osi fer resorti ki fasilite prizon lo zil Coetivy in zwe en rol mazer pour dekonzeste prizon e osi ede avek lenplimantasyon progranm reabilitasyon pour ki bann kondannen i ganny serten skil pour pli byen reentegre dan sosyete.

Me Msye Ramkalawan pa ti aksepte sa larepons e i ti demande ki minis i koz lo sa konfli ant IDC ek Lotorite Prizon e osi pour konfirmen ki bokou torti in ganny touye e lavyann ti pe ganny anmennen dan diferan landrwa, ki letan zot ti pran sa desizyon ti annan bato ki ti pe al Providence avek toutsort kalite marsandiz enkli keksoz ki prizonnyen i sipoze servi.

I ti demann Minis Mondon pour koz lo sa bann labi ki’n anmenn sa konfli e fer Lotorite Prizon pran sa desizyon.

Minis Mondon ti dir ki napa en konfli me plito dezakor ant sa de parti.

Konsernan torti ki’n ganny touye Minis Mondon i dir i posib e i pour sa rezon ki swivan lenformasyon ki zot in gannyen, zot in rod lasistans avek lapolis pour kapab konfirmen ki sa bann keksoz in arive.

Konsernan bann marsandiz parey pwason ek lavyann sale, koko, balye zig parmi lezot ki ti dekouver lo en bato ki ti mouy kot IDC e ki Sirentandan Prizon ti ganny apele pour vin vwar e apre i ti pran tou e transfer Prizon Montagne Posée, minis i dir zot pe esper en rapor lo sa size pour kapab etabli egzakteman kwa ki’n vreman arive.

Minis i dir antretan ki lanket pe deroule i pour sa rezon ki zot in retir bann prizonnyen lo sa zil.

Lo son kote Msye Ramkalawan ti demann minis pour konfirmen ki sa bato sa zour pa ti pe anmenn prodwi pour Montagne Posée me plito al debark son marsandiz Providence kot tou ti pou al pour diferan endividi e dan sa bann marsandiz ti osi annan ki ti’n aste avek larzan bidze e ki ti sipoze al pour bann prizonnyen.

I ti demande si i annan okenn aksyon disipliner kont sa ki responsab pour fer sir ki larzan lepep Seselwa i byen ganny servi.

Minis Mondon in konfirmen avek Lasanble ki lafouy ki ti fer lo sa bato ler i ti sorti Coetivy boner mwan pase ti devwal sa bann diferan keksoz e ki wi i annan lenformasyon ki sa bato ti pe al en lot landrwa e ki sa bann marsandiz ek materyo ti annan non fanmir bann zofisye ek staf prizon lola e Lotorite Prizon ti ganny enformen letan bato ti anrout e zot ti ale pour sezi sa bann marsandiz e retourn avek kot prizon.

Minis Mondon i dir ki tou bann lenformasyon ki zot ti’n gannyen in ede pour fer zot pran sa desizyon pour retir bann prizonnyen e preski tou travayer lo sa zil.

In osi dir ki zofisye prizon in mont Coetivy pour al verifye propriyete prizon e vwar kwa ki reste e i annan serten lafouy ki’n ganny fer e tou detay i ekspekte sorti dan en rapor semenn prosenn.

Me minis i dir serten aksyon ki’n pran dan limedya i ki IDC pa’n renouvle kontra enn son anplwaye lo Coetivy e o nivo prizon zot in osi reassign serten staf e si i annan nesesite pran bann aksyon pli sever, sa rapor ava determinen.

Me ki pou arive avek bann lenfrastriktir prizon lo sa zil ? Minis ti dir sa bann lenfrastriktir in fer avek larzan Leta e si desizyon i pran pour pa reanvoy prizonnyen lo sa zil, gouvernman ava deside ki pou fer avek sa bann lenfrastriktir.

Ti osi annan plizyer lezot kestyon konsernan sirtou sistenm pour sirvey deplasman bann bato, lekel ki plas komann lo bann bato, lekel ki verifye bann kargo, ki zot anmennen, valer sa bann kargo, lekel ki ti siny dokiman pour sa bato an kestyon e pour sa kestyon Minis Mondon ti dir ki responsab zil Coetivy ki ti siny son dokiman.

Antretan Minis Mondon in konfirmen ki ti napa okenn prizonnyen ki ti pran personn otaz lo Coetivy.

Sesyon Lasanble Zedi ti dernyen pour sa semenn i pou repran son travay Mardi le 1er Oktob.

 

More news