Lasanble Nasyonal |20 July 2023
Mosyon i demann gouvernman pour fer en letid pour revwar polisi e stratezi pour fer biznes
Lasanble Nasyonal in aprouv en mosyon ki demann gouvernman pour fer en letid pli profon ki enplik tou sekter kle ekonomik Sesel avek bi pour revwar polisi e stratezi ki a permet sekter prive reste soutenab e kree plis larises e lanplwa.
Sa mosyon ti prezante par manm elekte Linyon Demokratik Seselwa pour distrik Grand Anse Mahé, Onorab Waven William.
I ti ganny aprouve par 22 manm Linyon Demokratik Seselwa ki ti prezan, ti napa personn ki ti vot kont e 9 manm lopozisyon prezan pa ti vote.
Dan sa mosyon, Onorab William ti dir ki Sesel konman en pti pei i annan plizyer vilnerabilite, depi son pti popilasyon, limitasyon later ki kapab devlope pour plizyer proze tel ki lagrikiltir ou tourism ensi ki defi, parey son zistans avek bann marse pour fer leksportasyon, fre bato e avyon, ensi ki to taks e lasirans.
I ti osi koz lo bann lenpakt rezyonal e mondyal lo pei. I dir kot zot pe met lanfaz lo la an se moman se “devlopman soutenab”.
“Pa zis devlope an fou me pour touzour swiv en model devlopman ki soutenab.” I dir Sesel i bezwen annan plis diversite ekonomik letan i koz lo soutenabilite.
I dir sa letid pour reviz polisi nasyonal e stratezi se pour asire ki zot “reste azour avek realite dinamik devlopman mondyal”.
I azoute ki i ava osi donn gouvernman ‘real-time’ lenformasyon e pour kapab pran bann desizyon pli byen enformen e pli byen kalkile “pour kontinyen egziste an operasyon pour kree larises, permet gouvernman anmas plis taks, gard travayer dan lanplwa, kree nouvo lanplwa e menm agrandir e diversifye aktivite ekonomik”, i ti dir.
I’n osi dir ki i annan ankor travay pour fer dan ‘ease of doing business’.
Parmi bann kestyon i ti demande se eski gouvernman konman fasilitater pe ankouraz plis partisipasyon e promouvwar konsiltasyon, ou eski i annan lankadreman legal konvenab e si polisi i konvenab pour atir nouvo biznes.
Bann manm lasanble ki ti entervenir ti koz an faver sa mosyon, lenpakt ki pandemik kovid-19 in annan lo pei, e konman serten, sirtou bann pti sekter, pe vwar li difisil pour kapab remet zot lo lipye. Zot ti met lanfaz lo lenportans kree en lanvironnman ideal pour kapab fer biznes.
Dan son lentervansyon, manm elekte pour Beau Vallon, Onorab John Hoareau, ti propoze ki pei i eksplor bann mezir ki kapab koup lo lenportasyon, e agrandi lavant prodwi lokal, par fasilit biznes pour fermye par egzanp. I ti menm sizere ki i annan en ‘moratorium’ lo bann ‘retailers’.
Bann lezot pwen ti kouver devlopman sekter lapes avek en bato pour Sesel, e devlopman sekter lokal tel ki prodiksyon kannel.
Manm proporsyonnel dan lopozisyon, ‘United Seychelles, Onorab Wallace Cosgrow, ti dir Sesel i bezwen en lanvironnman ki ideal e ki donn loportinite antreprener Seselwa.
I ti dir ki bokou biznes in bezwen re-aziste e re-adapte apre kovid-19.
“Pour reste an mars e konpetitiv dan marse zot bezwen revwar zot kou biznes,” i ti dir. I ti koz lo bann defi tel ki pri elektrisite, transpor, ki eleve e ki fors biznes pour ariv lo en pri ki konpetitiv pour kapab kontinyen fonksyonnen.
En lot problenm ki bann manm ti leve ti prosedir birokratik pour ganny laprouvasyon, ki tarde e fer li difisil pour konmans en biznes. Akse a finansman ti osi ganny adrese.
Dan son konklizyon, Onorab William ti felisit gouvernman pour tou bann demars ki in fer ziska la pour devlop aktivite ekonomik pei e demann gouvernman pour vwar Lasanble Nasyonal avek tou son bann komite ki egziste konman en partener kle ki anvi travay akote zot pour kapab devlop pei.
Patsy Canaya