Kominike lapolis | 09 October 2019
En manman konsernen i raporte ki pa son fiy ki dan sa video akt endesan lo rezo sosyal ‘Whatsapp’
En manman in apros lotorite konsernen yer bomaten e raporte ki pa son pti fiy ki dan sa video akt endesan lo rezo sosyal ‘Whatsapp’.
Sa manman in fer sa rapor apre ki en dimoun in poste portre son pti fiy lo ‘Whatsapp’ e refer li koman sa pti fiy ki pe zwe avek parti prive en zonm. Sa i an relasyon avek sa video an sirkilasyon depi semenn pase, en ka ki lapolis pe fer lanket ladan.
Malgre kolaborasyon avek son bann partener, departman ledikasyon ek departman servis sosyal, lapel avek manm piblik e lanket anmennen par lapolis pour esey idantifye sa pti fiy enplike dan sa video an sirkilasyon lo ‘Whatsapp’, lapolis i dir ki napa nanryen konkret ki’n monte ziska aprezan.
Lapolis i azoute ki prenan kont gravite e sansibilite sa ka, portre e non dimoun ki pe ganny mansyonnen e pibliye an piblik, dan plas fer sa bann pos lo rezo sosyal, nenport endividi ki annan lenformasyon kredib ki zot krwar pou ede avek son lanket pour silvouple telefonn CID atraver son sant komand lo 4288000.
