Minister Lafanmir i kondann bann akt seksyel lo zanfan | 10 October 2019
Swivan en video ki pe ganny sirkile lo rezo sosyal ki demontre en akt seksyel avek en fiy miner, Minister Lafanmir in zwenn avek lapolis e tou lezot lorganizasyon konsernen pour kondann totalman bann tel aksyon par bann adilt ki annan responsabilite pour edik e protez byennet zanfan.
Dan en kominike lapres date le 9 Oktob 2019, sa minister i dir:
«Sa aksyon deplorab in tous nou tou e konman bann Seselwa responsab nou annan en devwar pour zwenn avek lezot pour elimin bann tel labi. Bann tel aksyon pervers anver zanfan pa devret pe arive dan nou sosyete e pa devret pe ganny tolere e aksepte.
«Nou pe demann tou dimoun pour denons bann tel aksyon e ede protez nou bann zanfan. Minister Lafanmir i osi demande ki aksyon sever dapre lalwa “sexual assault” dan kod penal i ganny pran avek bann endividi ki fer bann tel pratik imoral anver nou bann zanfan.
«Nou pe osi lans lapel avek tou endividi pour azir responsab e aret sirkil bann tel zimaz lo rezo sosyal e si zot annan lenformasyon pour ed lapolis pour aret sa ki responsab.»
