Follow us on:

Facebook Twitter LinkedIn YouTube

Entertainment

Marathon Man i lans albonm ‘Revolisyon’ | 26 October 2019

Marathon Man i lans albonm ‘Revolisyon’

Mara avek en kopi son nouvo albonm obor en lafis ki pe promot son nouvo louvraz

I fer 5-an depi ki artis e prodikter Marathon Man pa lans en albonm. Pandan sa peryod, in fer sorti en mixtape titre ‘Sidekick’ ki’n en gro sikse lo marse lokal e ki’n definitivman kit son mark atraver bann morso tel ki ‘Pez Nou Anba’ e ‘24er’ ki ankor pe sirkile lo radyo e ant son bann fans.

Sa fwa si, Marathon Man in vin avek ‘Revolisyon’, en nouvo albonm ki konpri 21 sanson ki’n ganny prodwir par Xtra Big e lavwa rikorde par Mara limenm, kot son prop studio Marathon Studios.

Parey bann fans i kapab ekspekte, bann morse lo sa albonm i melanze an term zanr lanmizik ki enkli reggae, seggae, dancehall, R&B, ki Mara limenm i dekri konman “en fizyon mizikal”.

‘Revolisyon’ in ofisyleman lanse depi le 16 Oktob e deza, Mara i dir ki reaksyon bann fans i pozitiv.

‘Frekanstasyon dalon’, enn bann sanson lo albonm, i deza pe fer sikse lo radyo e ti ganny lanse detrwa semenn avan konman en avangou. Sa morso, ki Mara in dir in rikorde avek bann zenn antet, i kominik en mesaz pour bann zenn konsider byen zot frekantasyon, sirtou a en moman kot bokou zenn in tonm dan bann perdisyon e dan labi sibstans ek lalkol.

“Sa travay i enn ki’n enspire par diferan leksperyans lavi e mon prop lobzervasyon e enterpretasyon sa sosyete dan ki nou viv. I tous enpe lanmour, ki lakle pour linite ek lape, lafanmir, lasosyete an zeneral e plis ankor,» Mara i dir.

«Mon kontan kan mon bann fans i dir mwan ki zot apresye mon travay e ki sanmenm ki zot ti pe ekspekte de mwan ou ki mon’n sirpas zot lekspektasyon,» Mara i dir.

Parmi bann morso lo albonm ‘Revolisyon’ i ‘Lanmour oubliye’, ‘Krwar mwan’, ‘Que pasa amigo?’, ‘Presyon i ogmante e ‘Mon wish’, en morso ki enterprete par Mara ek Lanna.

Mara in osi travay avek lezot artis tel ki Gunz, Richie B e i’n osi rikord en sanson avek XTra Big.

I promet ki pou annan bann video clips pour detrwa sanson e ki pou annan en gran spektak pour mark lansman ofisyel sa morso travay avan lannen fini.

I ti azoute ki menm si albonm e bann travay mizikal napa gran rannman finansyel lo marse lokal akoz piratri, lanmizik i son pasyon e en fason pour li eksprim son lekor.

«Pour mwan mon vwar li konman en lenvestisman e en fason pour mwan eksprim mon bann panse, obzervasyon e osi kominik serten mesaz. Alors pour mwan, i plis ki en travay kot ou pe ekspekte annan en rannman finansyel. Ou kapab dir ki lanmizik i en gran parti mon lavi e mon lidantite e i en lazwa pour mwan prodwir e met en travay deor pour mon bann fans,» Mara ti dir.

Albonm i anvant dan bann landrwa labitid a en kou R125 e i osi disponib avek Mara limenm pour R100.

 

Laura Pillay

More news