Follow us on:

Facebook Twitter LinkedIn YouTube

National Assembly

Lasanble i demann nouvo kondisyon pour permet madanm travay plis lizour dan sekter tourizm |31 October 2019

Lasanble in donn son sipor inanim en mosyon ki demann plis fleksibilite, nouvo kondisyon pour permet madanm travay zis shift lizour dan sekter tourizm.

Sa mosyon ki ti table par manm LDS Jany Letourdie pe demann avek gouvernman pour etidye, e met anplas bann nouvo kondisyon travay, pour permet bann madanm Seselwa ki kapab travay dan sekter tourizm pour ganny priyorite pour travay zis shift lizour, avek bi ankouraz zot pour pran lanplwa dan sa sekter enportan pour nou lekonomi e osi ede kre bann kondisyon favorab pour zot pran swen avek zot zanfan ek zot fanmir.

Ler i ti pe prezant rezon deryer son mosyon, Onorab Letourdie ti dir ki avek lavi ki’n evolye ek lezot defayans ki sirkonstans lavi i plonz li ladan e osi lefet ki i pa pe ganny en saler pour sa metye nob ki apel fanm lakour, en madanm i vwar li neseser pour al anploye pour sonny son zanfan, son prop lekor oubyen pour ed papa fer sa de bout zwenn.

“Me anmenmtan ki nou pe vwar plis madanm kit lakour pour al travay, parmi i annan bann manman, me osi bann manman tousel ki napa sipor en papa oubyen partener ki pe reste avek li pour konplet sa fanmir e partaz bann responsabilite,” Onorab Letourdie ti eksplike.

I dir sa i fer ki nou aprezan vwar plis bann ka delenkan, labi seksyel ek lezot fleo sosyal ki an rezilta lefe ki sa bann zanfan miner zot reste san sipervizyon pour en gran peryod letan.

“Me madanm i bezwen travay sirtou si i vwar li pe debout litousel e i inevitab ki i annan en kantite metye ki atoupri ou bezwen travay shift aswar,” Onorab Letourdie ti fer resorti.

Me anmenmtan i osi annan plizyer papa tousel ki trouv zot dan sa sitiasyon ki pe esey zot mye pour sonny e fer grandi zot zanfan. Me dan bann tel sitiasyon bann ki for i releve tandis ki bann ki vreman vilnerab i tonbe e pa kapab leve san led lasosyete.

Onorab Letourdie ti fer resorti ki sekter tourizm i ankor reste sa landrwa ki atrakte bokou madanm sirtou bann ki pli zenn pour pran en lanplwa e sa i en bon siny akoz i montre lenportans ki bann madanm i atase avek sa lendistri e zot osi konsyan ki tourizm i enn bann pilye enportan nou lekonomi.

Me sa ki nou vwar se ki bokou plas travay dan sa sekter i ankor vid anmenmtan ki bokou madanm pa dan lanplwa e sa sekter i bezwen rod rekour avek travayer etranze.

I dir i pa totalman vre ki bokou madanm Seselwa pa oule travay akoz i annan plizyer ki kontan travay dan lotelri me zot pa ti a voudre fer shift aswar akoz zot zanfan pou reste tousel oubyen pour rezon risk pour zot prop sekirite.

“I pour sa rezon ki mon pe demann gouvernman pour etidye e met anplas bann nouvo kondisyon travay pour permet ki bann madanm Seselwa ki kapab e ki ti a voudre travay dan sekter tourizm pou ganny priyorite pour travay zis shift lizour si zot prefere avek bi ankouraz zot pour pran en lanplwa dan sa sekter enportan nou lekonomi. Sa ava osi ede pour kre bann kondisyon favorab pour zot kapab pran swen avek zot zanfan ek zot lakour pour ed nou pei Sesel kre sa sosyete pli solid,” Onorab Letourdie ti konklir.

Tou sa plizyer manm ki ti entervenir lo sa mosyon ti fer resorti ki i annan bokou merit e ki avek lavi ki pe evolye bann madanm pe demann en konsiderasyon spesyal pour kontinyen amelyor zot kondisyon lavi.

I annan ki ti fer resorti ki sa mosyon i vin a en moman enportan kot lendistri touris pe fer fas avek bokou defi kot i konsern travayer e kot nou pe vwar bokou travayer etranze pe antre dan sa sekter.

I annan osi ki ti demande ki bann lotorite konsernen letan pe pran desizyon pour lavenir konsernan sa sekter enportan pour nou lekonomi zot bezwen reflesir e seryezman konsider bann pwen ki’n fer resorti atraver sa mosyon.

Lo son kote dirizan zafer gouvernman Msye Charles de Commarmond ti fer resorti ki li i pou met sa bann pwen devan gouvernman e si gouvernman i ekoute i kapab fer keksoz vitman pour amelyor kondisyon pour permet ki plis madanm i kapab antre dan sa sekter pour travay avek bann kondisyon ki fleksib.

 

More news