Follow us on:

Facebook Twitter LinkedIn YouTube

Education

Legzibisyon kot lekol Baie Ste Anne primer | 30 November 2019

Legzibisyon kot lekol Baie Ste Anne primer

Zelev i enpresyonn viziter avek zot travay resiklaz

 

‘Enpresyonan’ i mo ki plizyer paran in servi pour dekrir bann travay resiklaz ek lar fer par bann zelev lekol Baie Ste Anne primer pandan lannen.

Sa legzibisyon in organize par sa lekol ki’n profite pour demontre talan bann zelev.

Legzibisyon ki ti ouver pour en zour i anliny avek proze eco-school sa lekol, en proze ki’n eksit bokou lantouzyazm parmi bann zanfan.

Sak laklas ti ganny sans fer serten kontribisyon ki pou ganny ekzibite e sa ti lo nivo primer e lakres osi. Travay ki’n plizoumwen ganny fer pandan bann laklas ‘Technology Enterprise’.

Bann lobze ki ti an egzibit ti enkli lobze fer avek kartron, sifon, galon delwil, vye wayer, boutey plastik ek lezot ankor. Serten i kapab ganny servi dan lavi toulezour tel ki po fler, ‘feeders’ pour manze zannimo, bann zwe, bizou, lobze pour grat pwason, sak, ek lezot ankor.

Parmi bann lobze, i annan ki pe menm ganny servi konman ‘teaching aids’ par bann ansennyan dan bann diferan laklas.

«Bann zanfan i vreman enterese pour fer bann travay resiklaz e zot met bokou zefor pour asire ki nou lekol i reste ‘eco-friendly’ e soutenab,» responsab proze eco-school, Mis Karen Port-Louis, ti partaz avek zournal Seychelles NATION.

«Bann paran i osi apresye travay bann ansennyan pour enstrir bann bon valer resiklaz dan bann zanfan a en tre zenn-az, sa i ed zot devlop zot kreativite e osi montre zot plizyer teknik ki zot kapab met an aplikasyon kot lakour.

Akote bann paran, bann etidyan ti osi vin vizit legzibisyon e la ti kler ki zot ti vreman egeye pour vwar travay lezot zot bann koleg,» Mis Karen ti dir.

Mis Karen ti fyerman eksprim son lapresiasyon anver travay kolektif bann zanfan, ansennyan ek paran.

«Nou’n vreman apresye prezans bann paran pour vin vizit travay zot zanfan e serten in menm aste bann lobze. Nou osi rekonnesan anver lakominote ki toultan pare pour ed lekol avek bann materyo de baz pour nou bann travay resiklaz. Sa i montre ki kan nou travay ansanm, nou kapab akonplir bokou.»

Nou prezant zot serten portre bann egzibit tire par Romano Laurence.

 

Nadia Bédier

More news