Follow us on:

Facebook Twitter LinkedIn YouTube

National Assembly

Lasanble i aprouv ankor plizyer prozedlwa avan termin son travay pour sa lannen | 19 December 2019

Lasanble Nasyonal ti kontiny son diskisyon lo bann prozedlwa devan li yer apremidi olye bomaten e sa ti akoz Bills Committee ti’n pran bomaten antye pour pas lo serten sa bann prozedlwa ki i ti’n fek resevwar. Me apre sesyon yer apremidi, Lasanble ti konplet e termin son travay pour dernyen trimes sa lannen me pa avan ki sak manm ti’n sakenn son tour remersye zot bann siporter, partener dan zot bann distrik respektiv pour tou travay ek lakonplisman pour sa lannen.

Lasanble i ekspekte repran son travay boner lannen prosenn avek diskour Leta Lanasyon par Prezidan Larepiblik.

Dan son sesyon apremidi Lasanble ti konsider en prozedlwa pour bidze siplemanter ki gouvernman ti gannyen pour son bann depans anplis an 2018. Letan i ti prezant sa Supplementary Appropriation Bill Minis pour Finans, Komers, Lenvestisman ek Planifikasyon Ekonomik, Msye Maurice Loustau-Lalanne, ti eksplike ki sa prozedlwa i annakor avek Lartik 54 nou Konstitisyon pour regilariz sa bann depans gouvernman.

Minis ti fer resorti ki ti annan de bidze siplemanter an 2018 e en 3enm ki ti table sa semenn apre ki odit lo depans gouvernman ti’n fini fer e Lasanble ti bezwen regilariz sa bann depans anplis ki rapor oditer ti’n vwar.

A sa pwen Minis Loustau-Lalanne ti donn Lasanble en revi detaye tou sa trwa bidze siplemanter.

Premye ti aprouve par Lasanble an Zen 2018 a en sonm 218, 832, 694 roupi dan ki pli gro porsyon ti al pour Lazans Proteksyon Sosyal pour siport depans anplis atraver bann diferan lasistans sosyal, en sonm ti kouver depans redundancy bann travayer Air Seychelles, en lot sonm ti al anver depans pour en scheme of service pour drayver SPTC, pour pey aryeraz dan bann peyman pour Lazans Swen Lasante parmi lezot depans ankor.

Dezyenm bidze siplemanter ti aprouve par Lasanble le 31 Oktob 2018 a en sonm 436, 393,406 roupi e i ti kouver depans pour diferan realokasyon ki’n sorti kot en departman pour al kot en lot, pli gro sonm ti al anver repeyman aryeraz kontribisyon sekirite sosyal ki bann diferan departman ti annan e ki ti ankor dan liv SRC konman en det parmi lezot depans parey preparasyon atlet pour Zwe Dezil.

Trwazyenm ki ti aprouve sa semenn a en sonm 320,881,875 ti konsern depans bann grant ek bann lòn.

Sa prozedlwa ti ganny aprouve san gran deba.

Minis Loustau-Lalanne ti osi table en prozedlwa pour permet en dezyenm e nouvo lamannman dan lalwa Tourism Marketing Tax.

Minis ti eksplike ki sa i annan pour bi anmenn plis klarifikasyon pour bann biznes ki ganny zot reveni konman bann komisyon.

Sa taks i ganny sarze a en to 0.5% lo reveni ki sa bann biznes i gannyen. Sa bann biznes ienkli operater tourizm, labank, lakonpannyen lasirans, telekominikasyon, kontrakter Klas 1 osi byen ki operater kazino.

“Sa lamannman se pour klarifye ki bann biznes ki kalifye pour pey sa Tourism Marketing Tax dapre schedule e bann ki zot reveni i zis bann komisyon pour pey Tourism Marketing Tax lo zot komisyon selman e sa biznes pour dan en 2enm schedule. Sa bann biznes i bann DMCs ek bann lazans vwayaz,” Minis ti eksplike.

I ti fer resorti ki tou larzan kolekte atraver Tourism Marketing Tax i ganny depoze dan Consolidated Fund avan ganny bidzete dan fon Marketing Seychelles Tourism Board.

Sa lamannman ti ganny laprouvasyon bann manm Lasanble san bokou deba akoz pli boner atraver bann diskisyon dan Bills Committee bann manm ti’n ganny sans analiz sa prozedlwa dan en fason pli profon.

Zot ti demann plis klarifikasyon e diskit bokou lo son bann diferan laspe pour asire ki tou bann biznes gro ou pti i benefisye avek lendistri tourizm.

Dernyen prozedlwa ki Minis Loustau-Lalanne ti prezante ti pour amann lalwa International Trade Zone.

Dan son prezantasyon minis ti eksplike ki sa lamannman i en rekonmandasyon Linyon Eropeen pour ki i annan plis lamanman dan seksyon taks biznes ki kouver fabrikasyon anba International Trade Zone.

Minis i dir sa lamannman alor pou ede adres e rezourd bann konsern Linyon Eropeen ki fodre note ti’n donn Sesel ziska le 31 Desanm 2019 pour met anplas sa bann lamannman.

Bann manm ti rod klarifikasyon e plis leklersisman lo plizyer laspe sa lamannman avan ki zot ti donn zot laprouvasyon.

  

Marie-Anne Lepathy

More news