Follow us on:

Facebook Twitter LinkedIn YouTube

Entertainment

Tou in pare pour spektak ‘Vibrasyon2020’ |28 December 2019

Tou in pare pour spektak ‘Vibrasyon2020’

Bann manm ‘The Prophecy’ dan en portre souvenir avek Elijah, enn bann manm organizater sa spektak (Portre: Joena Meme)

Group mizisyen popiler ‘The Prophecy’ sorti Moris i dan pei pour partisip dan en spektak lafen lannen apele ‘Vibrasyon2020’ ki pou fer tanto lo mini stad, anvil.

Sa group nef mizisyen ki zwe lanmizik reggae ek segae, pou perform ‘live’ apartir minwi avek en repertwar zot bann sanson popiler tel ki ‘Nou Pou Sirmonte’, Zis Souvenir’, ‘Laglwar’, parmi lezot, ki sorti lo zot de album, ‘21st Century’ ek ‘Where we belong’.

I fer dezyenm fwa ki group ‘The Prophecy’ i vin Sesel. Lannen pase zot ti akonpanny santer enternasyonal Jamaiken, Duane Steffenson dan en festival lanmizik ‘Manieshaad’, avek partisipasyon bann lezot artis lokal e enternasyonal, ki ti fer lo mini stad menm.

Santer prensipal dan sa group, Murvin Clelie, i dir ki lannen pase pour zot premye leksperyans mizikal dan Sesel ti ‘mari serye’ e la tanto i pou pli ‘mari serye’ ankor.

“Nou konnen ki i annan bokou dimoun isi ki ekout nou bann lanmizik e nou atann ki bokou dimoun i prezan tanto. Nou’n fer en bon preparasyon pour sa spektak e nou sir ki bann dimoun pa pou dezapwente,” Murvin ti dir yer bomaten avek Zournal Seychelles NATION.

Murvin in osi akonpanny Jakhim dan enn son sanson lo son nouvo album ‘Deal i Real’ kot ansanm zot ekspekte perform sa morso.

Spektak tanto pou konmans 9er diswar e pou osi annan partisipasyon lezot artis lokal ki sant bann sanson nwel ek lannen tel ki Raymond Libanotis, John Wirtz, Joseph Sinon, benn Saturn, osi byen ki bann artis avek bann stil diferan tel ki Elijah, Extra-Big, Jakhim, Mercenary, Verna, Clive Camille, Richie B ek MV parmi lezot. Benn lokal ‘Bennzin’ pou osi la pour akonpanny serten bann artis lokal.

Dapre Elijah, en manm ‘Music Got Wing’ ki pe organiz sa spektak, tou keksoz i anplas pour tanto, ki pou en vre vibrasyon pour akeir lannen 2020. I demann bann fans pour fer sir ki zot pa mank sa. Tiket i anvant R150 ‘Kot Do’ dan lari bazar e aswar kot baro i pou kout R200.

 

Patrick Joubert

More news