Lasosyasyon pour Promouvwar Latrankilite ek Respe pa dakor avek lapwentman konsey distrik rezyonnal |11 June 2019

Lasosyasyon pour Promouvwar Latrankilite ek Respe dan distrik Saint Louis ti organiz en miting pour son bann manm ensi ki piblik an zeneral dan sa distrik lo size konsey rezyonnal ki gouvernman in met anplas depi Zilyet lannen pase.

Pa bokou dimoun ki ti rann lapel kot sa miting ki ti fer Dimans bomaten dan sant kominoter distrik Saint Louis, me sa ki ti la ti demontre zot mekontantman anver la fason ki konsey distrik in ganny met anplas.

Apre plizyer diskisyon, zot ti tonb dakor ki bann manm konsey distrik pa devret ganny nominen, sirtou par parti politik me ganny elekte demokratikman par bann zabitan dan distrik.

Dapre prezidan sa lasosyasyon, Msye Donald Ernesta, manda konsey distrik pe al terminen an Zilyet mwan prosen e zot pa ankor antann nanryen lo sa size.

I ti azoute ki zot ti’n envit zofisye sorti kot departman gouvernman lokal, tou le 7 manm konsey sa kat distrik – Bel Air, St Louis, Mont Buxton ek English River –, manm Lasanble Nasyonal enkli ensi ki ladministrater sa 4 distrik pour asiste sa rankont me zis ladministrater distrik Saint Louis, Madanm Rachel Joseph, ki ti prezan.

Lasal ti montre zot mekontantman anver labsans sa bann zofisye ki dapre zot zot ti devret la pour donn zot versyon e osi pour ekout e reponn bann konsern ki lasosyasyon i annan lo sa size.

Madanm Joseph ti enform zot ki Zedi le 13 Zen aparti 4er30, tou sa bann dimoun pou la dan sant pour donn leksplikasyon e reponn zot bann konsern.

Msye Ernesta ti dir ki zot byen apresye sa e ki zot a zwenn Zedi apremidi pour met zot bann konsern devan la ki bann dimoun apropriye pou la.