Follow us on:

Facebook Twitter LinkedIn YouTube

Entertainment

Athena Tour: Fanm For | 08 February 2020

Athena Tour: Fanm For

Artis fanm Seselwa i fer vibre Victoria

 

Gro lapli ek divan pa ti fer okenn diferans pour bann fans Mia ek Sandra Sanmdi pase (1 Fevriye)pour sa gran konser spektakiler, akote bann lezot artis fanm Seselwa, ki ti pran plas kot Mini Stad, Victoria.

Titre ‘Athena Tour : Fanm For’, sa konser i sirman enn ki bokou i kategoriz konman inoubliyab e ti enn ki bann fans Mia e Sandra ti pe antisipe avek bokou pasyans, vi ki sa de santez ti lans zot bann nouvo albonm ki’n tre popiler, pandan lannen pase.

Akote plizyer lezot artis fanm, tel ki Antoinette, Kelly, Emilie, Maria D ek Mary, sa de divas ti sakenn a son tour, e ansanm, anim lasware avek bann morso ki ti tre apresye par lodyans, ki ti osi donn lanmen sant zot bann sanson prefere. Byensir, benn Relations ti osi prezan pour met laganm.

Parey ti’n promet, spektak ti tre eksitan avek bokou sirpriz par Sandra ek Mia zot menm, osi byen ki lezot artis ki ti prezan pandan sa sware. Pour rann keksoz pli eksitan, ti annan bann sanzman kostim, bann diferan laranzman lanmizik e kolaborasyon ant bann artis osi byen ki koreografi, pour bann sanson pli ritmik.

San dout, bann ki ti ganny sans desann pour sa konser pan regrete! Lo rezo sosyal, Facebook espesyalman, bokou komanter i endik lapresyasyon pour sa travay formidab ki bann organizater, artis ek lezot partener in fer pour realiz sa konser, ki bokou in osi term konman pli bon konser e enn ki montre ki fanm Seselwa i kapab fer e ki zot osi zot annan en plas lo lasenn lanmizik lokal, ki souvann-fwa i dominen par bann zonm.

Bann portre ki akonpanny lartik i monte serten moman for sa konser.

Teks : Laura Pillay

Portre : Paradise Media

More news