Follow us on:

Facebook Twitter LinkedIn YouTube

Education

Lazournen Enternasyonal Lalang Maternel |22 February 2020

Lazournen Enternasyonal Lalang Maternel

Koz kreol zanfan !

 

Alokazyon Lazournen Enternasyonal Lalang Maternnel ki ti ganny obzerve yer, plizyer aktivite in ganny organize dan diferan kwen Sesel pour selebre lalang kreol.

Pour mark sa lazournen, en group etidyan lekol segonder Rivière Anglaise, ansanm avek bann manm Konsey Nasyonal pour Lar (Nac) e bann manm diferen Lasosyasyon Lapoezi ti organiz en progranm dan ki bann zanfan osi byen ki bann artis ek kreater renonmen ti demontre zot talan, an servan nou lalang maternel, kreol.

Pandan en pti lentrodiksyon, kordinater devlopman artistik dan Nac, Joenise Juliette, ti ankouraz tou prezan pour annan lafyerte pour lalang kreol and pour osi rekonnet zefor ki gouvernman in fer pour nou promouvwar e devlop nou lalang maternel atraver bann striktir ki in met anplas.

Sef egzekitif Nac, Jimmy Savy, ti osi adres bann zanfan ek etidyan e dir ki nou lalang kreol i enn bann eleman pli enportan dan kiltir en nasyon e par ki bann manm i kapab eksprim zot lekor dan en fason ki lezot i kapab relye avek sa mesaz.

An servan legzanp bann santer e osi poet, Msye Savy ti fer restorti ki bokou artis i sant an kreol akoz i en fason par ki zot lodyans i kapab konpran byen sa santiman ou mesaz ki zot pe esey kominike.

“Nou lalang maternel i sa langaz ki nou tande depi nesans e i en fason par ki nou kapab idantifye nou lekor. Mwan, kan mon ti termin mon letid ‘A Level’ e mon ti fer laplikasyon pour diferan plas travay me evantyelman mon ti swazir Lenstiti Kreol e sa bann lannen ti parmi bann lannen pli gou dan mon lavi. Alor, mon’n travay, eksplwat bann valer kiltirel, mon ti travay dan langaz e alor dan resers e sa in devlop mwan e in anmenn mwan lwen akoz mon pe debout devan zot ozordi konman en sef egzekitif,» Msye Savy ti dir.

Avan terminen, i ti osi fer resorti ki plizyer milyon dimoun atraver lemonn i koz lalang kreol e non pa zis Seselwa, e ankouraz bann zanfan pour valoriz zot lalang maternel, an dizan ki i kapab anmenn zot lwen dan lavi.

Swivan ladres Msye Savy, plizyer morso artistik ti ganny performen par bann etidyan zot menm, osi byen ki bann poet. Madanm Georgette Larue ti resit poem ‘Annou Apresye Lanmour’ tandis ki bann group zanfan ti resit poem baze lo lavi, lanmour e sikse ek lezot tenm. Zot ti osi enterpret bann morso sanson ki selebre lalang kreol ek leritaz kiltirel Seselwa.

Osi byen ki bann performans, sa lokazyon ti osi en loportinite pour lans Klib Lapoezi kot sa lekol, ki’n demontre bokou lentere e sa kapabilite pour devlop lapoezi dan zot lekol. Dapre Manmzel Juliette, se pour sa rezon ki Nac ti swazir sa lekol pour sa levennman, e osi fer en donasyon liv kreol pour ed bann manm sa klib.

Ansennyan Jacintha Sophola ti eksplike ki klib Lapoezi kot sa lekol ti lanse an 2017 dan departman langaz, vi ki bann ansennyan ti remarke ki bokou zanfan ti annan problenm avek ekrir e konpozisyon ekrir e alors sa klib ti lanse avek bi ankouraz zot pour ekrir plis e osi byen dvelop zot kreativite.

«Bann ansennyan in siport sa klib e ler nou ti konmanse, nou ti ganny led Msye Michel Savy e osi Reuben Lespoire ti ki fer de sesyon entrodiksyon e apre sa, tou le lannen, nou pa enkli zis nou lekol, akoz nou remarke ki ekrir i en problenm nasyonal, alors nou osi envit bann lezot lekol e envit zot pour konpetisyon ekrir poenm e ekrir zistwar kourt ki ede devlop zot lide. Lo konmansman nou ti pe konsantre plito lo angle me ler Manmzel Juliette in apros nou, nou’n deside agrandi li pour osi enkli kreol,» i ti dir.

Bann aktivite Klib Lapoezi i ganny fer dan Zedi pandan letan dezennen, vi ki zanfan i annan lezot komitman leson apre lekol. Sa klib in osi partisip dan bann aktivite avek Bling Bling Poetry dan lepase e pe ekspekte kolabor avek sa group ankor dan bann prosen semenn.

Osi pandan seremoni, bann etidyan S1 ki fek zwenn sa lekol aparti sa lannen e ki ti’n eksprim lentere dan sa klib, ti ofisyelman ganny swete labyenveni par Manmzel Sophola.

Parmi bann liv ki’n ganny prezante avek sa klib ek lekol i ‘Voyaz’ par Michel Savy, ‘Read me my rights’ par Lardwaz Associations, ‘Valer sa ki nou ete’ par Marie Clarisse ek Reuben Lespoire, ‘Mon Rev pour ou ek Mwan’ par Tella Lalande osi byen ki ‘Anthologies de Poesie Seychelloise’, ekrir par Guy Lionnet.

Bann portre ki akonpanny lartik i montre enn de moman for sa aktivite kot lekol Rivière Anglaise yer.

 

Laura Pillay

 

 

 

 

More news