Skandal delo kontaminen La Misère |30 March 2020
En group zabitan i kolekte zot larzan konpansasyon
En group zabitan La Misère ek Pti Barbarons ki ti ganny afekte avek delo kontaminen an 2010 in Sanmdi resevwar premye porsyon zot larzan konpansasyon dan swivan sa skandal.
Ti kot lekol La Misère ki sa premye group enpe plis ki 500 dimoun dan sa 1500 antou ti devret raporte ant 9er bomaten ek 3.30 apremidi pour pas atraver bann prosedir ki ti’n met anplas avan kolekte zot tyek.
Peyman pour fer an trwa group e bann dimoun dan sa premye group, anviron 560 zot, ti’n ganny kontakte par telefonn. Fodre dir ki avek sitiasyon COVID-19 dan pei, pour evite ki sa viris i propaze, tou mezir sanniter ti’n met anplas e dimoun, menm si ti groupe, ti gard zistans avek kanmarad.
Sak dimoun ti bezwen pas anba en latant pour reverifye si tou zot lenfomasyon ti annord avan al dan en laliny pour pran zot tyek.
Sekreter lo komite delo kontaminen La Misère, Lydia Jumeau, ti dir ki menm si sa prosedir ti deroul byen i annan dimoun ki pa’n ganny zot tyek akoz serten lenformasyon obor zot non ti manke.
I dir i annan serten zot ki pa ti’n anmenn zot kart idantite kot Minister Finans oparavan ler zot ti’n ganny demande e dan sa ka zot non i lo lalis me napa tyek pour zot e alor zot ekspekte ganny peye dan lot group.
Nou ava rapel ki 37.5 milyon roupi in ganny bidzete pour pey konpansasyon pour sa bann dimoun e zot pou resevwar sa peyman an de porsyon – enn sa lannen e lot porsyon lannen prosenn.
Madanm Jumeau ti dir ki sa de lezot group dimoun ava ganny averti plitar kan zot pou resevwar zot tyek.
“Nou pe atann Minister Finans letan zot pare. E la pou osi annan sa bann ki zot tyek pa’n pare e nou pe lans lapel avek tou dimoun ki pa ti’n fer li pour anmenn zot kart idantite e okenn lezot dokiman neseser kot Minister Finans si zot anvi resevwar zot tyek zot osi e pa anvi ganny kit deryer,” Madanm Jumeau in dir.
Antretan in fer resorti ki sa komite ti’n pran linisyativ pour ranmas en kontribisyon volonter 500 roupi avek tou bann adilt pour pey fre avoka dan sa ka vi ki i pa ti’n demann okenn lapey e sa ti avoka Bernard Georges. Me fodre dir ki pa tou dimoun ki ti byen akey sa linisyativ.
“Sa ti pour komite donn en tokenn apresyasyon Msye Georges akoz in fer en ta depans san demann en saler akoz nou bezwen mazinen si anka nou bezwen li ankor demen.
Fodre dir ki sa larzan konpansasyon in anmenn enpe soulazman pour sa bann zabitan menm si pour bokou zot sa larzan pa neseserman ase pour soufrans ki zot in pas atraver e depans ki zot in bezwen fer pour zot lasante. I annan ki ti ganny mikrob diardya ki’n bezwen pran bokou latizann, pour lamazorite zot, zot ti bezwen sanz tou tiyo dan zot lakaz e tousala i koute.
Antretan enpe plis ki trwa kar dimoun dan sa premye group in ganny zot tyek e lezot ava ganny enformen atraver lanons lo medya kan e kote zot pou kolekte pour zot.
Marie-Anne Lepathy