SORTI LA CORONA |24 April 2020
Dan sa lemonn beni kot nou kreater in tras son lepa
Lo sa latab sakre kot son sel garson ti partaz son dernyen repa
Ti napa plas pour bann move pandemik tel parey viris Corona
Ki anvi vin pran kontrol e atak san pitye lo nou ki pe viv isi ba.
Sa vilen viris i en voler rize ki pe travers tou teritwar mondyal konmsi li ki la,
Dan son semen napa ni ras, ni kouler, si ou anler oubyen anba.
To ou tar, i pa pou reisi fer plis fraka, nou pou kas son frekans e i pou nepli donn nou traka.
Sa lager ki nou pe lager san sesman lannwit lizour pa pou fini koumsa.
Sesel, menm si i en bizou presye, parey nenport ki pei i pa’n ganny eparnye dan tou son laspe,
Me sa pa pou zanmen fer son zanfan dekouraze e les nou lebra tonbe, sirtou bann ki lo fron batay ki zot lavi pe riske.
Konman en sel fanmir nou pou lite ansanm pour fer li sorti la ale.
Nou solidarite pli pwisan ki son lafors araze ki fer li propaze,
O Seselwa, nou en nasyon devoue, tou i posib avek Bondye,
Dan nou lesyel kot nou paviyon i flote avek bokou lafyerte, nou pou ekrir en mesaz kler pour detri sa viris danzere
Ki pe lite pour touy nou lavenir e fer nou zoli pti pei anfonse.
Atraver sa linite ki sofgard nou rezilyans, napa okenn santye pour li kontinyen fouraye e parwaze.
Departman Lasante ek lezot partener tre angaze pe enplor nou korperasyon; ‘Prevansyon pli bon ki gerizon’,
Silvouple, pret zorey atantivman e swiv tou bann lenstriksyon, pa rekile, fer ou par pour defann byennet nou popilasyon,
Pa met likou lo biyo pour bann fo platform medya ki pa neseserman pe donn bon lenformasyon,
Nou en nasyon ki annan bon ledikasyon malgre diversite nou lopinyon, pa zis ekoute me fer aksyon,
Gard zistans sosyal, pratik bon lizyenn personnel e mentenir bon nivo sanitasyon;
Bann pli bon zarm dan sa konba pour defet sa move lenfeksyon san fer okenn destriksyon.
Dan mon vizyon, mon admir zanfan dan baro lekol an souriyan, paran pe repran travay byen kontan, biznes pe rekipere e nou lekonomi pe refleri avek bon planifikasyon.
Letan sa bo zour i arive, mon leker pou dekore avek lazwa, pour revwar mon pei lo son de lipye, LAVIKTWAR pour proklanm labote Seselwa konman bann vre sitwayen ‘lanmour ek konpasyon’.
PAR: KARLY LIBANOTIS