Follow us on:

Facebook Twitter LinkedIn YouTube

Entertainment

Katty i kontinyen montre son gratitid anver bann artis ki’n ouver semen pour li pase |06 June 2020

Katty i kontinyen montre son gratitid anver bann artis ki’n ouver semen pour li pase

‘Des nains sur des épaules de géants’ oubyen ‘standing on the shoulders of giants’ i en metafor ki ganny servi pour montre lenportans ek lanbisyon entelektyel en endividi, baze lo travay bann gran panser, ou menm artis lepase pour asir progre lefitir.

Pour artis lokal Katty Melanie, son fason rekonnet travay bann artis lepase ki dapre li zot in ouver semen pour li pase, se atraver reprodiksyon zot bann sanson, me avek son prop lazisteman, e byensir latous, me an gardan orizinalite e osi konteni sa bann louvraz.

Zisteman, le 22 Me, alokazyon son lanniverser, Katty ti met lo marse en nouvo travay avek tit ‘En Lepok – Joseph Louise’ pour onor sa veteran lanmizik Kreol Seselwa.

Sa travay i trwazyenm dan en seri ki Katty in prodwir, swivan ‘En Lepok – François Havelock’ e ‘En Lepok – Guy Denis’.

Inisyalman renonmen pour son bann sanson plito baze lo tenm lanmour, Katty in deside pour retourn son paz dan lepase e al rankontre bann artis e osi bann tenm e topik mizikal ki’n diriz li ver son karyer kot in prodwi antou kenz albonm.

 

«En lepok i montre mon gratitid anver bann artis ki’n la avan mwan e ki’n ouver semen pour mwan pase»

 

Lide pour konmans sa seri travay en lepok ti vin letan Katty ti pe travay kot SBC konman prodiktris progranm televizyon ‘Melodies des Iles’ ki osi annan en kwen pour bann vye sanson.

Se pandan letan ki Katty ti pe fouy dan arsiv pour rod bann vye nimero ki i ti osi ganny enspire pour fer progranm ‘En Lepok’.

«Mon ti remarke ki sa bann sanson ti tre ris akoz bann santer lontan pa ti sant lo bann topik ki bann artis konmela i eksplwat bokou, tel ki lanmour,» Katty i eksplike, e i menm azoute ki se sanmenm sa bann sanson ki in grandi avek dan son letan lanfans, e ki i toutafe normal pour li kontan zot.

Dan lot mo, sa bann vye sanson in enfliyans li lo konmansman son karyer mizikal, sirtou dan son bann konpozisyon ki ti baze lo lavi kanton.

Rezon pour swazir Joseph Louise pour son trwazyenm travay ‘En Lepok’ i tre senp dapre Katty, ki eksplike ki stil lanmizk sa veteran i tre pros avek sa ki pour li.

Katty i osi servi sa loportinite pour promot bann vye travay parmi nouvo zenerasyon ki pa’n ganny sans pour apresye sa bann travay.

«I annan bann sanson ki mon’n resante lo sa de travay avan ki dimoun pa ti menm konnen lekel ki ti sante orizinalman, e zot ti krwar mon prop konpozisyon. Mon krwar ki menm si en artis pa aktiv, lanmizik i devret kontinyen reste vivan, e se dan sa loptik ki mon prodwir sa bann travay. Mon osi krwar ki dan sa bann vye sanson i annan plizyer keksoz bann artis sa zenerasyon i kapab aprann ladan, sirtou bann topik ki zot aborde. Alors, mon krwar ki nou devret reanmenn lavi dan sa bann sanson,» Katty ti dir.

I ti azoute ki «menm si mon’n tant pour gard lorizinalite sa bann sanson, mon’n osi fer laranzman mizikal dan mon fason, e mon’n osi servi bann lenstriman plito klasik, tel ki lakordeon, bennjo e menm vyolon. Mon’n osi travay avek en pti group mizisyen pour redwir kou. Mon’n osi redwir lo kolaborasyon lezot artis, senpleman akoz dan lepase in toultan en problenm pour ganny zot pandan bann spektak, oubyen lezot performans prive akoz zot ti egalman okipe avek zot prop performans, sirtou dan bann letan lafendimwan.»

Lo sa nouvo travay, sel artis ki’n kolabor avek Katty se Gunz ki aparet lo sanson ‘Mo konn pedale’ ki’n fini konmans popiler lo bann stasyon radyo lokal.

Dapre Katty, Gunz in sa dimoun apropriye pour anmenn sa stil diferan ki’n donn sa sanson sa latous ki fer piblik apresye.

 

«Mon premye transpor, e menm mon lakaz, mon ti aste an parti avek lavant mon lanmizik»

 

«Konmela avek lakantite kopi (piratri), i pa fasil pour vann lanmizik parey avan. Menm si mon pou met mon sanson lo Tropical Sound, ki en nouvo sit kot nou pe vann lanmizik, ler en dimoun in aste son kopi, i pou kapab partaze, e sa i kout nou konman artis bokou.

«Bann kopi atraver teknolozi in afekte lavant en kantite, konpare avek letan mon ti fer mon bann premye prodiksyon ki ti lo CD ek kaset sa letan kot mon ti pe vann sis a set mil kopi. Mon premye transpor, e menm mon lakaz, mon ti aste an parti avek lavant mon lanmizik. La konmela sa i enposib, e mon pa krwar i annan en artis ki pou vante pour dir i vann sa kantite.

«Sirtou, la avek COVID-19 kot napa konser oubyen fonksyon prive, i enposib pour ganny bann reveni siplemanter.»

«Me selman sa pa dekouraz mwan, akoz mon rod lezot fason alternativ pour vann mon lanmizik, menm atraver WhatsApp aletranze, e mon bann kliyan i touzour onnet avek mwan. Menm si i touzour annan sa risk ki lanmizik pou ganny partaze, mon kontinyen fer lanmizik akoz mon lanmour pour sa form lar,» Katty i eksplike.

Sa nouvo albonm in ganny anrezistre e rikorde par Ricky Fred kot Excellent Studio, e parmi bann mizisyen ki’n partisip lo la i Aeron Fred, Ruben Larue, Danny Jules, Garry Florentine e Dareal Thing.

Bann ‘fans’ i kapab aste sa albonm lo CD pour 125 roupi, oubyen lo lakle USB pour 150 roupi.

 

Roland Duval

 

 

 

 

More news