Follow us on:

Facebook Twitter LinkedIn YouTube

National Assembly

Lasanble Nasyonal i repran son sesyon normal | 12 June 2020

Lasanble Nasyonal ti repran son bann sesyon travay normal Merkredi bomaten avek bann manm ki ti rod plis lesplikasyon lo desizyon Spiker Nicholas Prea pour fer en ruling lo en ka me kot en manm ti met o defi son desizyon e kit lasal.

Premye pour pran laparol ti tyermenn Standing Orders Committee, Onorab Bernard Georges, ki pe zisteman diriz bann diskisyon e deba pour amand e revwar serten lartik dan sa dokiman ki gid bann prosedir ek bann regilasyon pour bon deroulman e fonksyonnman Lasanble Nasyonal.

Onorab Georges ti met lanfaz lo nesesite pour definir enn fwa pour tou pratik Lasanble Nasyonal an sa ki konsern poste keksoz lo medya sosyal.

«Eski sa pratik i ki en manm napa drwa poste keksoz lo medya sosyal ler Lasanble Nasyonal i an sesyon?

Oubyen eski i napa drwa poste en keksoz lo medya sosyal apartir precinct Lasanble Nasyonal? Oubyen eski okenn dimoun ki dan precinct Lasanble Nasyonal pa kapab poste en keksoz lo medya sosyal? Ou ankor eski en manm napa drwa poste en keksoz ki kontradir sa ki en lot manm in dir dan Lasanble Nasyonal lo medya sosyal e i devret fer li dan Lasanble Nasyonal li menm? Tousala pa kler me nou bezwen definir zot,» Msye Georges ti dir.

I ti ensiste ki sa i bann pwen refleksyon ki ansanm konman en lasanble zot bezwen ariv lo en desizyon lo kisisa sa pratik lasanble lo medya sosyal e kwa ki bann manm i kapab ou pa kapab fer lo medya sosyal pandan ki Lasanble Nasyonal i an sesyon ou apre e osi Lasanble Nasyonal i bezwen konsider bann sanksyon ki aplikab apre en pratik Lasanble.

«Normalman sa manm responsab i demann en leskiz e si sa pa arive e sa manm i refize obeir spiker, la i bezwen retir son lekor,» Msye Georges ti eksplike.

Lo son kote, Spiker Prea ti dir ki i pa ti’n fer son ruling an sitan Standing Orders me plito Parliamentary Practices.

I ti fer resorti ki parmi bann premye keksoz ki 6enm Lasanble ti entrodwir se posibilite pour servi teknolozi enternet dan Lasanble Nasyonal e bann manm ti ganny dir pour fer sa avek tou responsabilite pour permet zot fer zot travay byen. I ti dir ki Lasanble Nasyonal i bezwen en spiker pour asire ki travay lasanble i deroul byen e annord. I ti osi ensiste ki son ruling pa ti kont Lartik 102(1) pour enpoz oubyen erode laliberte lekspresyon ki en manm i annan. I ti dir ki sa bann laliberte i bezwen ganny egzerse avek responsabilite.

«Mon ruling ti konsern kwa ki en manm in dir ‘in the House’ ki kapab ganny raporte me konman i ganny raporte. Si sa ki sa manm in dir i ganny distorted e sirtou par en lot manm ou en dimoun dan precinct Lasanble Nasyonal ki tonb anba responsabilite spiker. Timing ki sa lartik in ekri e poste, lokasyon e par ki tousala in ganny fer..., » Spiker Prea ti dir.

I ti azoute ki tou sa bann diferan eleman i bezwen ganny konsidere si pour fer antre dan kod etik bann manm oubyen si zot pou ganny retire konpletman e les manm poste keksoz nenport ler e kan ki zot oule.

Dirizan lopozisyon Msye Wavel Ramkalawan lo son kote ti dir ki li i anvi rod laklerte dan sa sitiasyon e in dir ki i bezwen annan keksoz ki kler e an ekri. I’n demande ki tou bann manm i ganny en kopi Parliamentary Practices an relasyon avek litilizasyon medya sosyal dan parlman.

«Enn fwa ki tou keksoz i ava lo papye i ava kler pour sak manm. I osi neseser pour annan en kod ki kler an sa ki konsern litilizasyon medya sosyal. Ladan i ava osi annan sanksyon ki ava aplikab pour manm ki pa swiv Parliamentary Practices akoz se la kot mon krwar nou problenm i ete akoz sanksyon i depan lo spiker antyerman,» Msye Ramkalawan ti fer resorti.

Letan i ti fer referans a sa trwa ka oparavan, Msye Ramkalawan ti fer remarke ki sanksyon ki ti aplikab pa ti parey pour sa katriyenm ka sa semenn.

«Si i ti’n parey a tou nivo, pa ti pou’n annan okenn problenm. Da sa enn ka sa semenn Parliamentary Practices in sot dan Standing Orders e mon krwar se sa lyen ki’n manke dan ou ruling. Si dan ou ruling ou pa ti’n met toulede ansanm – demann leskiz e sorti dan lasanble – ou ruling ti pou’n ganny vwar dan en lot fason,» Msye Ramkalawan ti eksplike. Apre i ti al dan plis detay dan en leksplikasyon lo fason ki i dir spiker ti’n devret adres sa sitiasyon.

I ti azoute ki tou sa bann keksoz i bezwen resorti dan en fason kler pour evit tou polemik. I dir ki ‘demann leskiz’ osi i devret antre dan Standing Orders e son formil ki swa ekri ou verbal i devret kler akoz pour le moman i pa’n ganny ekri okenn par. I ti azoute ki sa ki’n arive sa semenn dan Lasanble Nasyonal imontre «ki nou pa lo menm paz konman en Lasanble Nasyonal».

«Mon anvi senpleman dir ki mon krwar dan rule of law akoz rule of law i tir tou posibilite pour en dimoun pas en santans ki pa an ekri e se sa ki nou’n vwar. Santans ti diferan avek dan bann lezot ka oparavan,» Msye Ramkalawan ti eksplike.

Spiker Prea lo son kote ti dir ki santans pa ti parey me verbatim i la lo rikord ki ava ziz desizyon ki in pran dan sa dernyen ka. I ti fer resorti ki apre ki i ti’n dil avek sa 3enm ka i ti dir klerman ki prosennman i pou pran aksyon pli sever.

Msye Prea ti admet ki Lasanble Nasyonal napa Parliamentary Practices e prosedir ki kontrol litilizasyon IT e medya sosyal akoz prezan ki sa i permet dan Lasanble. Me in fer kler ki i debout akote son desizyon.

Plizyer lezot manm ti osi eksprim zot lo sa desizyon e en manm LDS Waven Woodcock ti lir en let sorti kot onorab Gervais Henrie ki enplike dan sa lensidan lo rezon akoz i ti’n sorti dan Lasanble Nasyonal e akoz i pa ti prezan pour sesyon Merkredi.

Pandan son sesyon Merkredi apremidi, Lasanble Nasyonal ti kontinyen avek son travay pour revwar dokiman ki gid son travay e son pratik.

 

Marie-Anne Lepathy

 

 

More news