Follow us on:

Facebook Twitter LinkedIn YouTube

National Assembly

Lasanble i kondann lensidan fiziyad e demann gouvernman pour pran aksyon konkret | 27 June 2019

Lasanble Nasyonal in yer fermeman kondann lensidan fiziyad ki ti arive Mardi swar kot Bel Air Store kot son propriyeter ek son travayer ti ganny atake e blese avek en revolver par en zonm maske.

Spiker Lasanble Msye Nicholas Prea, dirizan lopozisyon Msye Wavel Ramkalawan, dirizan zafer gouvernman Msye Charles de Commarmond osi byen ki manm elekte pour Bel Air Msye Norbert Loizeau ti pran laparol pour piblikman kondanm sa lensidan. Zot in demande ki minis konsernen i vin fer en deklarasyon lo sa size zarm an sirkilasyon dan pei.

Lo lapar Lasanble Spiker Prea in eksprim son senpati a manm fanmir sa de viktim e osi zabitan sa rezyon e swete ki sa de viktim i reganny zot lasante vitman.

In fortman lans lapel avek bann dimoun ki pe anmenn drog dan pei pour arete fer li akoz zot pe detri nou bann zenn e fabrik nou sosyete e in demann tou lazans ki ranforsi lalwa pour vin pli vizilan e pour pran aksyon apropriye pour anpes drog kontinyen antre dan nou pei.

Msye Ramkalawan i dir sa lensidan ti koz bokou komosyon dan sa pti kominote e in osi kre bokou lenkyetid ek lafreyer parmi popilasyon.

“Lefe ki en tel lensidan in arive i montre ki i annan zarm ki pe sirkile e ki dan lanmen dimoun ki pa devret,” i ti fer resorti.

I ti osi fer referans a plizyer lensidan kot zarm in raporte manke e osi konsern kot serten dimoun in ganny ofer pour aste en zarm e in demande ki i annan aksyon konkret ki ganny fer lo lapar gouvernman.

I’n demande ki lotorite konsernen i fer en analiz pour konnen kote bann zarm manke i ete, lekel ki an posesyon pour kapab retir zot alatrenn.

In osi swete ki sa garson i kapab ganny kestyonnen e donn otan lenformasyon lo lorizin sa zarm e lekel ki’n donn li parmi lezot ankor.

“Nou bezwen pran sa lensidan serye akoz konman politisyen se nou ki bezwen adres bann size ki pa tou dimoun ki kontan parey drog, lalkol ek bann fleo sosyal e alor nou osi nou met nou dan en pozisyon kot nou vin en target e alor mon demande ki gouvernman i fer leneseser pour aret sa e nou konman politisyen nou bezwen met en stop avek sa kalite lensidan e dir ki isi Sesel nou viv dan lape e dan larmoni e nou viv dan konprenezon e nou pa servi zarm ek vyolans akoz sa pou detri nou sosyete plis e nou pei pa bezwen zarm pe ganny servi dan bann sitiasyon,” Msye Ramkalawan ti fer resorti.

I’n osi eksprim solidarite a kominote bann marsan a en moman kot zot dan bokou lenkyetid.

Lo son kote Msye de Commarmond osi in kondann sa lensidan konman en aksyon deplorab ki’n vin deranz sa lape e larmoni ki Seselwa in toultan zouir e nou pa anvi ki keksoz i dekal plis ki sa.

Li osi in eksprim son solidarite avek bann marsan, kominote sa rezyon osi byen ki fanmir sa garson enplike dan sa lensidan.

“Bann aksyon parey pa bon pour nou sirtou la ki nou annan bann viziter enportan dan nou pei e nou pe apros nou zournen nasyonal. Nou demande ki tou lotorite konsernen i fer tou bann lenvestigasyon neseser e ki lapolis i servi tou son resours pour al o pli profon posib pour kapab vwar laverite e latransparans e dekouver kote sa zarm i sorti akoz nou pa krwar ki zarm i devret dan lanmen sivilyen,” Msye de Commarmond in dir.

I’n lans lapel avek okenn manm piblik osi byen ki sa garson enplike ki annan lenformasyon pour korpere avek lapolis pour kapab konn laverite dan sa zafer.

Lo son kote Msye Loizeau ti eksprim son sagren profon e i ti tre emosyonnel ler i ti pe eksprim son lekor lo sa lensidan ki’n enplik bann dimoun ki i konn tre byen ki swa sa de viktim osi byen ki sa zenn garson ki’n komet sa krim akoz i konn li byen e bokou fwa i ti koz lo son bann rev e sa ki i anvi fer dan son lavi. I dir i zis malere e sagrinan ki in tonm dan drog.

“Mon anvi dir bann zenn lala en legzanp kwa ki kapab arive ler zot deside antre lo drog ki apel eroin; i vin parey en bebet anndan ou e nenport ki keksoz ou kapab fer zis akoz ou bezwen larzan pour ganny eroin e mon demann zot pour sorti e pa antre dan sa bann mers koumsa akoz i danzere e zot kapab fer bann aksyon ki zot pou regrete,” Msye Loizeau ti dir.

I eksprim son solidarite avek kominote Bel Air ki’n azir pour met sa garson anba kontrol.

More news