Lafet Lendepandans |27 June 2020
Msye Ramkalawan
‘Annou kontinyen apir nou pei konman bann vre patriyot’
“Alokazyon lafet lendepandans nou dir ou bonn fet e ansanm annou kontinyen apir nou pei konman bann vre patriyot e annou tou le zour donn li sa ki meyer.”
Sa swe I sorti kot dirizan lopozisyon dan Lasanble Nasyonal, Wavel Ramkalawan, alokazyon nou lafet lendepandans ki tonm Lendi le 29 Zen.
Mesaz entegral Msye Ramkalawan i lir koumsa:
“Ser, frer Seselwa,
“Lannen 2020 pou en lannen ki pou mark nou dan en fason signifikan.
Premyerman, nou a pe selebre 44-an depi ki bann dirizan sa letan ti demande ki Sesel i pran son lendepandans e nou ti vin en pep endepandan. Dan sa menm lannen 2020, nou pou selebre 250-an depi ki bann premye dimoun ti vin etablir zot Sesel. Me, pli enportan ankor lannen 2020, nou pou annan en eleksyon prezidansyel ki pou determin ki mannyer nou pei i kontinyen.
“Alokazyon lendepandans, byensir mon anvi premyerman swet zot tou en bonn fet lendepandans.
“Me, anmezir ki nou selebre nou lendepandans fodre ki nou reflesir lo nou pei limenm. Ki kalite pei nou ti a kontan trouve? Ki mannyer eski OU konman en zabitan ou santi ki ou pei, anmezir ki ou travay pour li, pe fer ou vin sa dimoun ki ou ti a kontan ete?
“Ou laliberte, laliberte non selman pour eksprim ou, me laliberte ki annan osi pour fer ek ou sekirite. Laliberte ki annan pour fer lo ki mannyer ou travay e ki mannyer konman en zanfan ou kapab ganny meyer ledikasyon posib. Konman en adilt, ki mannyer ou travay i vreman donn ou sa sans satisfaksyon. Tousala se bann keksoz ki enportan dan lavi.
“Me, anmenmtan osi, par lao tou, toultan nou bezwen remersye nou kreater. Nou bezwen remersye li parski i vey nou. Nou'n war ki mannyer in protez nou pandan sa moman COVID-19. I’n donn nou bann dokter ek bann dirizan lasazes pour diriz nou atraver sa moman difisil. Me selman i’n la, pour li protez nou. Alors nou dir Bondye mersi.
“Mon ti a kontan kit zot avek en mesaz tre senp. Nou tou ansanm nou bezwen konstrir sa pei. Sa pei, konsider li konman pour ou, anmezir ki mwan osi tou, mon konsider li konman pour mwan. Savedir i pour nou tou. Alor annou travay byen. Annou travay dir pour nou devlop nou pei. Pour nou donn nou zanfan ek bann zenerasyon ki pou vini apre nou sa ki meyer, dan lafason ki nou protez nou lanvironnman, e dan lafason ki nou pran bann desizyon.
“Frer ek Ser, Sesel i nou pei. Sesel i nou manman. Alors a lokazyon lafet lendepandans nou dir ou bonn fet e ansanm annou kontinyen apir nou pei konman bann vre patriyot e annou tou le zour donn li sa ki meyer.
“Bonn fet Lendepandans a zot tou.”
Wavel Ramkalawan
Lider Lopozisyon dan Lasanble Nasyonal