Dan Lasanble Nasyonal |24 July 2020
Zabitan La digue i kont demolisyon kordgard
Swivan bann konsern ki’n leve resaman par serten zabitan La Digue ki pe obzekte demolisyon vye kordgard pour ki en nouvo batiman i ganny konstri dan son plas, Minis Dezinyen Macsuzy Mondon in dir si i neseser zot pare pour rekonmans diskisyon lo sa size e in demann bann zabitan pour soumet zot rekomandasyon avek gouvernman.
Minis Dezinyen Macsuzy Mondon i responsab portfolyo zafer entern e i ti donn sa leklersisman letan i ti pe reponn en kestyon lo sa size dan Lasanble Nasyonal anmennen par manm elekte pour La Digue, Madanm Noline Soffola ki ti anvi konn bann difikilte ki minister ti pe rankontre vizavi konstriksyon sa batiman, si tou bann group konsernen ti’n ganny konsilte lo son plan parmi lezot pwen ankor.
Minis Mondon in ensiste ki son minister pa pe rankontre okennn problenm pour konstri sa nouvo kordgard akoz kontra in fini sinyen avek kontrakter me i plito serten zabitan La Digue e reprezantan Monuments’ board ki pa anvi ki en nouvo batiman i konstri kot sa enn vye i ete e zot anvi ki sa vye batiman i ganny prezerve pour servi konman en mize e ki gouvernman i rod en lot landrwa pour konstri sa nouvo kordgard.
Minis Mondon i dir ki travay ti’n sipoze komanse le 15 Zilyet me avek sa bann nouvo konsern ki’n leve departman lapolis ek Minister pour Labita, Lenfrastriktir e Transpor lo Semen in ganny enformen ki travay in ganny met on hold pour lemoman.
«En kordgard i en batiman sekirite e son lokasyon i bezwen stratezik pour loperasyon lapolis,» Minis Mondon in dir.
In fer resorti ki dan bann nouvo kordgard ki zot pe konstri sirtou kot i konsern sa enn La Digue, zot in ganny konsevwar konman en sub headquarters avek tou fasilite servis e sistenm modern pour loperasyon lapolis. Provizyon in osi fer pour plis lespas pour lezot servis sekirite nasyonal.
Fodre dir ki diskisyon lo sa proze kordgard ti konmanse depi 2017 me Minis Mondon i dir i konpran si zabitan i annan serten rezervasyon lo sa proze.
Minis Mondon in sizere ki zot anvoy zot bann konsern ek rekonmandasyon kot gouvernman pour konsiderasyon tou-t-an prenan kont bann fakter enportan ki relye avek sa proze.
Me MNA Soffola ti anvi konnen si tou bann departman konsernen ti’n ganny konsilte ler sa proze ti ganny konsevwar.
Lo sa pwen, Minins Mondon i dir i responsabilite Lotorite Planing letan en proze i ariv devan li pour asire i fer tou konsiltasyon neseser.
Me in dir si i annan serten sekter ki ti’n merit me pa’n ganny konsilte, oubyen konsiltasyon pa’n ase, son minister napa problenm pour retourn kot bann zabitan e tou bann konsern ki pe sorti ava ganny pran an konsiderasyon.
Marie-Anne Lepathy