Eleksyon Zeneral 2020 |30 September 2020
Parti politik i demar PPB pour eleksyon Lasanble Nasyonal
Par Christophe Zialor/Laura Pillay/Marie-Anne Lepathy/Roland Duval
Dan kad kanpanny pour Eleksyon Zeneral 2020, sa kat parti politik ki’n nomin kandida pour eleksyon Lasanble Nasyonal ti demar zot progranm politik (PPB) lo radyo ek televizyon yer swar.
Sa kat parti se One Seychelles, Lalyans Seselwa, United Seychelles ek Linyon Demokratik Seselwa.
Sak parti ti annan 26 minit sakenn pour prezant zot progranm.
Ozordi pou annan en poz dan sa bann progranm e apartir demen, Zedi, se bann kandida pour eleksyon Lasanble Nasyonal, enkli bann kandida endepandan, zot menm ki pou adres elektora e sa pou ganny fer par de distrik alafwa.
Nou prezant zot en ekstre progranm dan lord ki sa kat parti politik ti fer yer swar lo televizyon dan kad kanpanny pour eleksyon Lasanble Nasyonal.
One Seychelles: “Fodre vot pour en reprezantan ki pou reprezant son distrik me pa son parti politik»
«Si ou satisfe avek ou reprezantan pandan sa 4-an edmi dan Lasanble Nasyonal, en dimoun ki ou pa’n vwar, en dimoun ki’n inyor ou pandan 4-an alors vot rouz ouswa vot ver,” Msye Alain St Ange, Prezidan parti politik One Seychelles ti dir ler i ti demar kanpany bann parti politik pour eleksyon Lasanble Nasyonal yer swar.
I ti azoute ki One Seychelles pe vin annavan avek bann vre reprezantan ki pou travay avek zot distrik e ekout bezwen zot voter.
I ti kontinyen par dir ki fodre vot pour en reprezantan ki pou reprezant son distrik me pa son parti politik.
«Konbyen fwa zot distrik i ganny mansyonnen dan Lasanble Nasyonal pandan sa dernyen 4-an? Si zot anvi fer menm fot ki zot ti fer pandan dernyen eleksyon revot rouz ouswa ver,» Msye St Ange ti dir.
I ti kontinyen par dir ki Seselwa i bezwen en reprezantan ki pou lalit pour zot dan Lasanble Nasyonal e rod en solisyon pour son distrik semenn apre semenn.
Msye St Ange ti donn de legzanp kot i konsern bann problenm ki ‘home carers’ pe fer fas avek e lapey pansyonner ki met zot par anba laliny lapovrete.
Msye St Ange ti azoute ki dernyen Lasanble Nasyonal pa’n anmenn okenn ‘private members bill’ ki tous sa Seselwa, sel proze-d-lwa ki ti ganny anmennen par Lasanble Nasyonal ti konsantre lo offshore sector ki’n benefisye bann ki annan larzan me pa Seselwa ki pe soufer.
«Alor frer ek ser Seselwa, fodre zot reflesir le 22, 23, 24 Oktob e elekte en dimoun ki pou reste akote ou, sa dimoun ki pou mars avek ou, sa dimoun ki pou vreman reprezant pep Seselwa,» Msye St Ange ti dir.
One Seychelles pe ganny reprezante dan 18 distrik pour sa eleksyon Lasanble Nasyonal.
Lalyans Seselwa i met lanfaz lo linite e en vizyon pour lefitir
Lider parti Lalyans Seselwa Patrick Pillay ti pandan progranm parti politik yer swar le televizyon SBC dir ki sa eleksyon i tre tre enportan dan listwar Sesel e ki i enportan ki Seselwa i inifye e get ver lefitir.
Msye Pillay ti koz lo lenportans pardonnen pour bann keksoz ki’n fini pase, e demann pep Seselwa pour koste ansanm, anliny avek tenm Lalyans Seselwa ‒ ‘Devan, Ansanm’ ‒ pour sa kanpanny eleksyon Lasanble Nasyonal dan ki zot pe partisipe.
Lalyans Seselwa i reprezante dan sa eleksyon pour syez Lasanble Nasyonal par trwa kandida – Weston Wirtz ki pe debout pour distrik Rivière Anglaise, William Cadeau konman kandida pour distrik Les Mamelles e Neville Quilindo ki pe debout pour distrik Au Cap – ki ti osi ganny entrodwir pandan sa progranm.
Msye Wirtz ti ankouraz bann zabitan son distrik pour vot pour li e donn li en sans pour travay pour son distrik, kot in ne, grandi e kot i abite ziska prezan, an prometan ki avek li konman reprezantan distrik pou napa «ek nou, pa ek nou».
Lozman, lanplwa e lenportans diversifye lekonomi pei, ti parmi bann pwen touse par kandida Cadeau. Msye Cadeau ti osi koz lo lenportans envestir dan bann sekter tel ki lapes avek bi zener plis reveni pour Sesel.
Kandida pour Au Cap, Msye Quilindo ti eksprim son lentansyon pour kontiny bann proze lo nivo son distrik e demann zabitan son distrik pour travay ansanm.
Ou ava rapel ki parti Lalyans Seselwa i reprezante selman dan eleksyon Lasanble Nasyonal. Nominasyon Msye Pillay pour debout dan elesyon prezidansyel ti ganny rezete zour nominasyon, le 16 Septanm, apre ki en lot kandida ti obzekte lo baz ki sa kandida pa ti’n satisfer kriter 500 sinyatir voter anrezistre.
« Siport en lekip dan lasanble ki pou defann ou lentere» – United Seychelles
Kandida prezidansyel United Seychelles, Msye Danny Faure, in lans lapel avek pep Seselwa pour elekte en lekip dan Lasanble Nasyonal ki pou travay avek konpasyon, kouraz, determinasyon e ki pou vreman fer nou Lasanble Nasyonal vin enn kot lavwa lepep ava ganny tande e kot lentere lepep ava ganny defann.
Msye Faure in dir ki konman prezidan pandan sa dernyen 4-an in trouv li pe viv avek en swa ki pep Seselwa ti fer an 2016. E sa ti en swa ki i dir i ti bezwen respekte. I dir ki son travay konman prezidan pei pa’n fasil fas a en Lasanble Nasyonal kontrole par lopozisyon.
«Mon pa’n kapab apwent minis ki mon ti a’n voudre, mon’n bezwen fye lo sipor United Seychelles pour ki bidze i pase e ki bann lalwa enportan osi i pase. Sa sitiasyon in anmar mon lanmen e parfwa paraliz travay serten sekter ek departman gouvernman,» Msye Faure in dir.
Msye Faure in azoute ki swa devan nou i kler, fas a sa kriz ekonomik ki nou trouv nou ladan nou bezwen en lekip ki konpran tre byen akoz in ganny elekte e sa se pour servi lepep e non pa pour avans azanda politik.
«Sa lekip ki nou pe prezant avek ou i en group dimoun ki pou anmenn en nouvo souf dan politik Sesel, ki pe siport en fason travay ki pou rod solisyon olye zis kritike. Ki pou inifye distrik e ki pou travay pour anmenn vre devlopman la kot ou reste,» Msye Faure in dir.
Msye Faure in osi fer resorti ki sa lepok ki nou ladan nou napa letan pour gaspiye me ki le 24 Oktob i sans ki nou annan pour met dan Lasanble Nasyonal en lekip ki pou siport en bidze ki pe ganny prepare akoz ladan i annan nou lapey, nou pansyon, larzan pour lopital ek lekol, larzan pour fer pei marse.
Msye Faure in osi dir ki i annan plizyer lalwa ki bezwen ganny diskite, refer, amelyore, e ki restriktir gouvernans pei ki i dir i annakor avek son plan pour form en gouvernman linite nasyonal.
«Mon bezwen en Lasanble Nasyonal ki pou siport striktir neseser avek meyer lalwa posib pour byennet pep Seselwa. Dan sa moman ensertitid nou reelman bezwen en manm elekte ki pou vin en men for la dan ou kote dan distrik. Dan moman fernwanr i bezwen la pour apiy ou e ed ou trouv solisyon e siport ou,» Msye Faure in dir.
Nou ava rapel ki ti le 28 Septanm 2016 ki lepep Seselwa ti desid lo konpozisyon 6enm Lasanble Nasyonal kot zot ti elekte en mazorite LDS.
Lopozisyon ti kanpanny lo en mesaz ‘Fer li ou Lasanble’ me ki dapre parti United Seychelles ti ganny vitman oubliye e ti ganny ranplase par en azanda politik byen kalkile pour marzinaliz e abes okenn lenstitisyon ou endividi ki ti ganny persevwar konman enn ki pa ti pe deservi azanda politik LDS.
Parmi bann lenstitisyon ki United Seychelles i dir ti premye pour ganny targete ti zidisyer ki ti’n fek fini rann en zizman kont LDS lo zot petisyon eleksyon ki zot ti’n anmenn ankour.
Pandan bann lannen lezot lenstitisyon parey STC, APDAR, minister responsab pour finans, departman DICT ti ganny targete e menm menase avek zot bidze ki ti neseser pour zot fonksyonnman.
Anvi sa sitiasyon, United Seychelles ki ti minorite dan Lasanble ti vwar li fas a en gro latas pour reisi siport en azanda ki ti pou benefisye pep Seselwa e fer gouverman delivre lo son promes. La osi plizyer endividi ek lenstitisyon ti ganny trennen devan plizyer komite lasanble avek bi pour abes zot e fer zot swadizan rann kont. Ti en politik ek nou pa ek nou e enn kot LDS ti servi bidze konman en zouti pour met otaz gouverman.
Dapre parti United Seychelles «ozordi 6enm Lasanble Nasyonal i bezwen rann kont Seselwa lo zot performans. Me pli enportan ankor pep Seselwa i merit dekouver e konpran vre azanda LDS.»
Msye Basil Hoareau, en avoka par profesyon e en ansyen reprezantan United Seychelles dan 6enm Lasanble, in fer resorti ki i enportan ki bann manm ki nou pe ganny demande pour elekte dan sa prosen Lasanble zot bann dimoun ki kapab e pare pour defann lentere nou bann distrik ek nou pei.
«Me i osi enportan ki bann manm ki ganny elekte zot osi respekte sa lenstitisyon. Respe pour sa lenstitisyon Lasanble Nasyonal i osi ganny demontre par respe pour sa enn ki pe diriz Lasanble Nasyonal e sa se spiker,» Msye Hoareau in dir.
I’n osi fer remarke ki nou’n vwar pandan sa 6enm Lasanble ki LDS in a plizyer repriz mank respe pour Spiker Nicholas Prea ki i dir in en zonn ki’n desarz son responsabilite konman spiker avek enparsyalite, en keksoz ki i dir LDS pa ti apresye.
Msye Hoareau in demann tou Seselwa pour swazir e elekte zot bann reprezantan ki krwar dan demokrasi, ki krwar dan fer keksoz dan en fason drwat e zis.
I dir ki i senserman krwar ki sa bann kandida ki United Seychelles pe prezante i bann dimoun ki pou fer keksoz dan en fason drwat e zis e ki pou annan respe pour Lasanble Nasyonal.
Lo son kote, kandida vis-prezidan parti United Seychelles, Msye Maurice Loustau-Lalanne, in demann tou Seselwa pour servi zot sans pour elekte bann manm Lasanble Nasyonal ki kapab alafwa kontinyen son rol oversight lo gouvernman me pli enportan, dan sa moman kritik ki nou ladan, pour pa anmar lanmen gouvernman pour li delivre pour pep Seselwa.
Parti United Seychelles pe ganny reprezante dan tou le 26 distrik pour sa eleksyon Lasanble Nasyonal.
«Rol en Lasanble Nasyonal i pou asir latransparans dan en pei atraver tyek ek balans» - LDS
Swivan travay formidab sizyenm Lasanble Nasyonal, parti Linyon Demokratik Seselwa (LDS) i dekrir sa prosedir eleksyon ver setyenm Lasanble konman en pon ki pou zwenn lepase avek lavenir, afen ki brans lezislativ gouvernman i a kontinyen fer sa travay ekselan pour kit lepep Seselwa azour avek bann diferan desizyon gouvernman.
Sa i pou en travay ki pou demann bokou zefor ek devosyon sak endivdi ki direkteman enplike dan sa prosesis.
Sa legzerzis pa pou enn kot LDS pe senpleman rod vot, me plito enn kot sa parti pe demann tou Seselwa pour pran li konman en misyon e vokasyon personnel pour pran en desizyon ki pou bon pour tou sitwayen, e anmenn plis prosperite dan nou pei, afen ki sa fernwanr a ganny ranplase par laklerte ek lanmour.
Sizyenm Lasanble Nasyonal i ganny dekri konman sa enn premye ki’n delivre son responsabilite dan en lanvironnman demokratik anliny avek nou Konstitisyon atraver tyek ek balans lo gouvernman.
Sa sizyen lenstitisyon in osi re-anmenn limaz sa brans gouvernman, pandan ki in atrakte latansyon pei antye atraver son bann deliberasyon.
Parmi bann premye sanzman anmennen par sizyenm Lasanble, bann manm ti asiz plis ki enn fwa par semenn, e legzersis depouy bidze nasyonal ti al pour bokou plis letan.
Bann minis ki ti ganny nominen ti bezwen vin reponn kestyon bann manm avan ki zot ti ganny konfirmen.
Bann diferan komite ti osi fer zot travay envestigasyon pli profon, kot bann o zofisye gouvernman ti ganny kriye pour reponn kestyon lo bidze, e osi lo bann diferan proze, e sa nouvo fason travay ti pas an direk lo radyo ek televizyon nasyonal.
Lopinyon piblik lo travay sa sizyenm Lasanble i tre pozitiv, sirtou kot i konsern rann kont lo kestyon larzan ek fon piblik.
Sa ti sirtou atraver depouyman bidze kot bann diferan minister ti ganny demande pour al re-travay lo zot bidze avan ganny laprouvasyon.
En legzersis konpletman diferan avek travay bann Lasanble oparavan.
Laklerte lo size later in osi en pwen for sa sizyenm Lasanble kot lepep Seselwa in konn bann prosedir e pratik enzis enplike dan distribisyon later dan pei.
Travay sa sizyenm Lasanble in permet sa brans gouvernman zwe son vre rol dan prosesis Lademokrasi Sesel.
I’n osi permet sa brans gouvernman zwe son vre rol dan lagrandisman lademokrasi Sesel, atraver sirvey depans ek reveni, e osi byen ki lenplimantasyon proze legzekitiv.
Atraver sa, in asir bonn gouvernans ek latransparans.
Dapre dirizan parti LDS, Msye Roger Mancienne, sa sizyenm Lasanble in sanz limaz sa lenstitisyon, e in evolye pour permet lepep pli byen apresye son fonksyon.
«Lefe ki in fer son travay byen, sa in donn nou en konmansman pour ranforsi, e get lavenir nou bann lasanble dan lefitir ki mannyer zot fonksyonnen pour zot ranforsi sa kalite travay ki sizyenm Lasanble in fer,» i ti eksplike.
Kandida prezidansyel LDS, Msye Wavel Ramkalawan, in lider lopozisyon depi 1998, e in toultan diriz en lopozisyon ki ti an minorite, kot zot lanmen ti ganny anmare, e pour premye fwa dan sizyenm Lasanble in pran sa pozisyon kot lopozisyon in sorti an minorite pour vin mazorite.
I dir ki i vreman fyer travay sa sizyenm Lasanble e travay ki’n ganny fer anba son gidans.
«Mon krwar sa ki nou’n vreman montre se ki Lasanble i la konman en lenstitisyon ki regard afon kwa ki gouvernman pe fer, poz kestyon, ganny larepons apropriye, e kapab fer pei bouze. Mon’n vreman fyer sa sizyenm Lasanble akoz in travay pa parey bann lezot Lasanble. Alors baze lo travay sa sizyenm Lasanble, mon krwar ki travay sa setyenm Lasanble pou pli diferan ankor,» Msye Ramkalawan in eksplike.
Dapre Msye Ahmed Afif, ki kandida vis-prezidan LDS, lefikasite sa sizyenm Lasanble in ganny demontre bokou dan fason ki larzan piblik in ganny depanse, e legzersis depouyman bidze nasyonal i en legzanp tipik.
«Bidze lontan parey nou konnen ti ganny fer dan de ou trwa zour e bokou manm piblik deor pa ti menm konnen ki mannyer zot larzan ti pe al ganny aprouve, e depanse dan diferan departman dan gouvernman, e nou ti demann bokou kestyon ki’n fer piblik vreman apresye. I’n annan landrwa kot nou’n ‘freeze’, e menm koupe, e sa in definitivman ede pour fer gouvernman fer savings, e an menm tan vin pli efikas,» in azoute.
Dapre Msye Jean-François Ferrari, ‘chief whip’, ki dan langaz parlmanter i annan responsbilite pour gard lekip ansanm dan en sel direksyon, sa travay pa’n enn fasil, akoz dan LDS, tou dimoun i ganny sa sans pour eksprim zot lopinyon e konsern, e enn fwa ki tou i ganny met lo latab, group antye i bezwen vin ansanm pour trouv en solisyon komen pour bouz devan pour Sesel.
«LDS i en parti ki respekte e ki valoriz tou lopinyon, e alors, tou keksoz, nou bezwen diskite. Tou keksoz, i annan bann manm ki annan zot prop lopinyon lo la, me selman anba gidans Msye Ramkalawan, nou’n fer sir ki tou sa bann lopinyon in ganny pran an konsiderasyon. Sak fwa ki nou ti pran okenn desizyon, nou ti fer li konman en lekip, e se pour sa ki mon fyer ki pandan sa letan ki mon’n fer sa travay, nou performans dan Lasanble in vreman egzanpler,» Msye Ferrari i eksplike.
Pandan sa 4-an ki sa sizyenm Lasanble in asize, manm pli aze ti Bernard Georges ki en veteran dan politik. Pour li osi i fer premye fwa ki in servi dan en Lasanble kot lopozisyon ti pli for, e en tel pozisyon in permet sa lenstitisyon pour anmenn bann sanzman ki zot pa’n kapab pandan sa senk dernyen Lasanble.
«Sa dernyen Lasanble pa’n parey bann Lasanble avan pour de rezon, enn se ki i ti diferan e de se ki ti annan en lopozisyon ki ti ansarz Lasanble. E, mon bezwen dir ki anba gidans lider lopozisyon, nou’n revizit bann fason ki travay i devret ganny fer, travay doub lafors, e nou’n kapab anmenn tou bann sanzman ki pandan lontan nou ti pe sizere. Toudenkou nou’n vwar nou dan en pozisyon kot nou’n kapab fer arive sa bann sanzman. Mon krwar ki lepep Seselwa in rekonnet ki sa sizyenm Lasanble in enn ki lemeyer pour nou pei. Malerezman, en Lasanble li tousel pa kapab fer tou keksoz, e gouvernman i bezwen fer sa ki Lasanble i demann li pour fer, e se la kot sa pa’n arive. Se pour sa rezon ki nou ekspekte, e nou espere ki lepep Seselwa ava sa fwasi donn legzekitif ek lasanble dan lanmen LDS pour ki nou kapab realiz tou sa bann keksoz ki pandan lontan nou’n propoze,» in eksplike.
LDS pe ganny reprezante dan tou le 26 distrik pour sa elekzyon Lasanble Nasyonal.