SFWU i donn son reaksyon lo fristrasyon bann doker kot IPHS | 30 October 2020

Aktivite kot Ile du Port (Portre: Thomas Meriton)

Swivan en lensidan kot serten doker (stevedore) avek lakonpannyen Ile du Port Handling Services (IPHS), Ile Du Port, ti refize travay Merkredi bomaten, an siny tir zot fristrasyon lot serten kondisyon travay ki zot pa ti dakor avek, Federasyon Linyon Travayer Sesel (SFWU) ti zwenn avek zournal Seychelles NATION yer bomaten pour donn serten leklersisman lo sa lensidan.

Dapre tyermenn SFWU, Antoine Robinson, sa linyon ti an diskisyon avek sa bann doker lo zot bann konsern e osi avek sa lakonpannyen, byen avan sa manifestasyon fristrasyon Merkredi bomaten.

I ti osi dir ki i annan en pe letan ki linyon ti pe koz avek IPHS lo konsern sa bann doker me bann larepons pa ti satisfezan.

I ti fer remarke ki apard konplent lo lafason ki zot ‘overtime’ i ganny organize e ganny peye, ki zot pa satisfe, sa bann doker ti a pe osi konplent lo zot konze annyel lefe ki zot ganny zis en ‘retainer fee’ R2500 ler napa bato ki zot krwar i pa ase, zot landwra repo ki pa konfortab e ki pa izyenik, lo lafason ki zot bann travay ‘shift’ i ganny organize e ki pa konvenab, lorganizasyon travay pour desarz disel ki zot pa satisfe akoz zot pa pe ganny peye ler zot fer sa travay dan Dimans ler zot ti sipoze ‘off’, kondisyon peyman pour desarz kontener ki zot krwar i pa ase an konparezon avek bann lezot lazans ki fer menm louvraz, en revi dan peyman tonnaz an relasyon avek nouvo regilasyon an plas, konsiderasyon pour travay anplis ki zot pe fer anvi en mank mendev, transpor ki zot ganny byen tar apre travay pour zot al se zot, parmi lezot.

Msye Robinson ti dir ki se li ki ti tanporiz sitiasyon sa zour e organize pour sa kat reprezantan bann doker antre dan miting negosyasyon avek management IPHS Merkredi bomaten, kot sa linyon pa ti ganny drwa asiste.

I ti dir ki sete de son reprezantan doker ki ti enform li ki zot bezwen son lasistans e zot pe refize pour al travay akoz sa lakonpannyen pa ti le ekout zot konsern lo zot kondisyon travay me plito demann zot pour al andeor baro. A sa moman i ti fer remarke, ti annan anviron 25 doker ki ti enplike.

I ti deklare ki in ariv lemoman ki sa bann size i ganny adrese e bann doker zot ganny en serten ‘fairness’ dan zot kondisyon travay.

Yer i ti zwenn sa bann reprezantan ankor dan en lot miting lo sa size.

Dapre zofisye resours imen sa lakonpannyen, Sally Viel, swivan sa premye rankont avek sa kat reprezantan bann doker, management pou rezwenn avek zot ozordi pour donn son desizyon. Sa miting pou osi enkli lezot ‘stakeholders’ ki enplike.

Patrick Joubert