Follow us on:

Facebook Twitter LinkedIn YouTube

Domestic

Zabitan, propriyeter biznes Fairyland i eksprim konsern lo nivo tapaz kot nouvo carpark |16 November 2020

Zabitan, propriyeter biznes Fairyland i eksprim konsern lo nivo tapaz kot nouvo carpark

Plizyer zabitan ek propriyeter biznes Fairyland Anse Royale in eksprim konsern lo lentansite tapaz, sirtou lanmizik for, sorti lo nouvo carpark bor lanmer dan sa landrwa sirtou dan aswar ek dan wikenn.

Zot dir ki sa sitiasyon pe vin deplizanpli entolerab e pe afekte zot.

Semenn pase, manm elekte Lasanble Nasyonal pour Anse Royale, Sylvanne Lemiel, ti anmenn ansanm dan sa landrwa reprezantan plizyer lazans konsernen enkli lapolis ek lanvironnman pour zwenn avek sa bann zabitan ek propriyeter biznes pour diskit sa sitiasyon e trouv meyer solisyon pour sa nwizans.

Sa bann dimoun ek proriyeter biznes ki santi zot pe ganny afekte i dir sa problenm in konmanse depi ler sa morso lans anfas avek lotel Le Relax ek lezot pti letablisman touristik, in ganny amenaze e en nouvo miray ek carpark in ganny fer e konmans ganny servi par manm piblik depi detrwa mwan pase.

Avek viziter dan nou pei ki tre rar i annan biznes ki pe perdi sa detrwa kliyan ki zot gannyen akoz serten zot kliyan i deside check out lo selman 3enm zour zot sezour akoz zot dir zot pa kapab dormi avek tapaz lanmizik ki entolerab.

En lot zabitan i dir ki tapaz lanmizik i ale ziska granmaten e i ti a swete ki ti ava annan plis lord dan sa landrwa pour anpes sa bann tapaz lanmizik sorti dan bann loto ki vin park la.

“Nou pou bezwen trouv en solisyon pour sa problenm ki’n konmans pti a pti e la pe agrave e pe sot balizaz. Menm problenm nou pe gannyen kot legliz Katolik kot laba osi obor lanmer dimoun i zis servi bann lespas vag pour vin fer en kantite tapaz e enteronp vwazinaz e menm zour pret letan i vin dir zot aret fer tapaz. Laba osi lapolis pe ganny difikilte me in annan serten larestasyon e mon pe ankouraz lapolis pour ranforsi sa lalwa pour anpes dimoun groupe,” Madanm Lemiel in dir.

Departman Lanvironnman li i dir ki sa bann problenm parey zot gannyen enpe partou lo Mahé me zot pe anvizaze met bann bord pour endik dimoun ki mannyer pour pli byen servi sa landrwa tandis ki reprezantan lapolis Asistan Sirentandan Antoine Denousse i dir lapolis pe entansifye son patrol dan sa bann landrwa e pe aret dimoun kot i neseser.  

“Si keksoz pa amelyore nou pe mazin menm met lasenn pour ferm sa carpark aswar pour fer ki dimoun napa akse avek,” Msye Denousse in dir.

Me pour bann dimoun ki servi byen sa landrwa san vin bwar lalkol la, Msye Denousse i dir sa pa pou en problenn me lapolis i la pour ranforsi lalwa.

Bann portre ki akonpanny lartik i montre sa rankont ki bann lotorite ti gannyen avek propriyeter biznes dan sa landrwa.

 

Marie-Anne Lepathy

Photos: Sylvanne Lemiel

More news