United Seychelles i prepar pour eleksyon nouvo lider parti ek komite egzekitif | 27 November 2020
Komite egzekitif nasyonal parti politik United Seychelles in Merkedi apremidi, anliny avek konstitisyon parti, aprouv prosedir pour eleksyon en nouvo lider parti e 15 manm komite egzekitif, boner lannen prosen.
Swivan miting ki ti fer Merkredi, United Seychelles pe formelman envit tou manm parti ki enterese pour debout konman nouvo lider parti ouswa pour konteste enn dan sa 15 pozisyon lo komite egzekitif nasyonal, pour pas kot sekretaryat parti, Maison du Peuple, pour kolekte bann dokiman neseser.
Sa i pou premye fwa ki leadership parti i ganny elekte anba son nouvo konstitisyon ki ti vin an fors an Novanm 2018. Par kont, prosedir pour selekte e aprouv bann kandida United Seychelles ki ti debout dan eleksyon Prezidansyel ek Lasanble Nasyonal ki fek fer, ti ganny dirize par bann lareg formile anba sa nouvo konstitisyon.
Dernyen dat pour koleksyon bann dokiman (form) i Vandredi le 4 Desanm e dat limit pour retourn sa bann form i le 11 Desanm 2020 kot sekretaryat. Tou bann aplikan pou ganny ‘vet’ par ‘ethics commission’ parti e pou bezwen deklar zot bann ‘assets’.
Se dan en kongre ekstraordiner, an Zanvye 2021, ki nouvo lider parti e sa 15 manm komite egzekitif nasyonal pou ganny swazir atraver en eleksyon.
United Seychelles i reste konvenki plis ki zanmen ki son bann prensip lazistis sosyal, egalite dan loportinite e kot okenn Seselwa pa devret zanmen ganny kit deryer i pli relevan ozordi la ki parti i trouv li dan lopozisyon.
United Seychelles pou reste sa vre lafors pozitiv dan Sesel e pou debout pli for ki zanmen pour defann zentere lepep Seselwa.
Kominike sorti kot parti United Seychelles