Follow us on:

Facebook Twitter LinkedIn YouTube

Entertainment

En konpilasyon sanson Nwel ek Lannen pour ‘Make a Child Smile’ | 16 December 2020

En konpilasyon sanson Nwel ek Lannen pour ‘Make a Child Smile’

Kouvertir sa albonm

Plizyer santer ek mizisyen in zwenn ansanm e sakenn in fer en sanson ki aparet lo en konpilasyon 19 sanson Nwel ek Lannen ki’n konmans vann depi sa wikenn.

Tou larzan ki ranmase pou al pour lorganizasyon ‘Make A Child Smile’ ki pou aste kado pour bann zanfan ki pe viv avek dezabilite e bann ki mwen fortinen.

Sa albonm ki annan pour tit ‘Nwel ek Lannen Dezord’ i en linisyativ DJ Ezy D e i dir ki 80% sa albonm i bann nouvo sanson.

Parmi bann santer ki’n partisip lo la i Emmanuel Marie, Michelle Marengo, Richie B, Ion Kid, Da Real Thing,Tania, Kethy parmi lezot ankor.

“Nou’n fer sir ki ler dimoun pe aste sa albonm zot pe ganny bann sanson Nwel ek Lannen,” Ezy D i dir.

I’n osi fer resorti ki zot in swazir sa tit vi bann diferan sitiasyon pandan sa lannen ki’n fer 2020 pour ensidir en lannen dezord e zot krwar sa tit i apropriye pour dekrir sa lannen.

I dir lide deryer en tel linisyativ i ki sa lannen zot pa pe ganny bokou donasyon pour sa koz saritab.

“Toulezan mwan ek mon tim nou ede pour rode e kolekte donasyon pour ‘Make A Child Smile’. Me parey nou konnen sa lannen avek sa sitiasyon Covid-19 bokou lakonpannyen in osi ganny afekte e pa bokou ki pe donnen volonterman parey avan e alor nou’n vin avek sa lide pour sa albonm,” Ezy D i dir.

I’n profite pour lans lapel avek dimoun pour aste enn sa albonm ki kout R125 dan bann landrwa labitid e R100 avek bann artis zot menm e fer sa pti kontribisyon pour sa lorganizasyon ki ede anmenn en pti kado pour sa bann zanfan me non pa pour partaz sa albonm ek kanmarad lo medya sosyal.

“Si zot fer sa zot pou afekte lavant sa albonm. Alor aste orizinal e ede donn en pti kado sa bann zanfan.”

Sa albonm i anvant Lari Bazar Kot Do, Praslin kot Tapas, e La Digue kot Laura.

Sanmdi apartir 6er diswar pou annan animasyon Nwel devan lapos e bann artis pou la pour vann sa albonm e pou osi annan posibilite pour piblik fer okenn donasyon ki zot anvi.

Dimoun i osi kapab aste sa albonm anliny lo sit Tropikal Sounds.

 

Marie-Anne Lepathy

More news