Madanm Alda Philo i selebre en lot lanniverser |16 July 2019
Pli vye madanm dan distrik Anse Royale, Madanm Alda Philo, ti selebre son 104enm lanniverser Dimans le 14 Zilyet.
Pandan en pti rankont pour selebre sa gran zour ki son fanmir ek zanmi ti’n organize pour li kot i reste avek son fiy Madanm Josephine Leon Les Cannelles, Madanm Philo ti resevwar plizyer kado ek en pannyen fler sorti kot son bann zanmi trwazyenm-az Anse Royale prezante par Madanm Anne Barra.
I ti osi resevwar en pannyen avek plizyer keksoz ladan sorti kot Prezidan Danny Faure e sa ti prezante avek li par Msye Emmanuel Toussaint sorti kot Gouvernman Lokal, enn par MNA distrik Anse Royale Sylvanne Lemiel, en lot par son fanmir e plizyer lezot pti kado ankor.
Madanm Philo, ki ziska prezan i ankor touzour parey son labitid, i ankor pe zouir en bon lasante. I osi ankor byen dayo e i pa ti ezite apre ki i ti’n koup son gato pour degourdi son vye lazanm an dansan detrwa pti parti.
Nou lekip i swet madanm Philo tou de bon dan son lavi e en bon lasante touzour.
Bann portre ki akonpanny lartik i montre enn de moman for sa pti selebrasyon lanniverser.
