Follow us on:

Facebook Twitter LinkedIn YouTube

National Assembly

Apre sispansyon deba lo mosyon pour aprouv lapwentman Msye Patrick Victor konman anbasader |18 July 2019

Komite Zafer Etranzer dan Lasanble i prezant son rekonmandasyon

 

Lapwentman Msye Patrick Victor pa pou kapab ganny fer anba Lartik 64(1) Konstitisyon akoz sa i a kapab anmenn konplikasyon legal alavenir, lezot opsyon pour sa lapwentman apard ki anba Lartik 64(1) in ganny konsidere tel parey en konseye kiltirel dan biro prezidan oubyen en anvwaye spesyal prezidan pour bann misyon spesifik.

Sa i selman de parmi plizyer rekonmandasyon ki Komite Zafer Etranzer (IAC) dan Lasanble ki ti’n ganny responsabilite pour rezourd sa sitiasyon vitman ti prezante yer apre diskisyon ki i ti fer Vandredi pase avek sekreter prensipal pour zafer etranzer osi byen ki sekreter prensipal pour kiltir dan en rankont lesanz ek diskisyon ki ti osi asiste par lezot manm lasanble ki ti enterese avek sa size.

Nou ava rapel ki Lasanble Merkredi pase ti deside pour sispann deba lo sa mosyon table par dirizan zafer gouvernman Msye Charles de Commarmond ki ti pe demann Lasanble  pour konsider aprouv lapwentman Msye Patrick Victor konman ambassador at large me avek lanfaz spesyal lo promosyon nou bann valer kiltirel. Lasanble ti vote pour sispann deba lo baz ki;

- ti annan en mank klarite dan sa lapwentman

- ti neseser rankontre avek bann o zofisye dan bann minister konsernen pour rod plis leklersisman e sete IAC dan Lasanble ki ti’n ganny responsabilite pour fer sa travay.

Bann dirizan dan Lasanle ti’n demande ki sa sitiasyon i rezourd o pli vit posib e IAC ti organiz sa rankont zisteman pour esey vwar en solisyon e bann rekonmandasyon ki ti sorti dan konklizyon sa rankont i konm swivan;

- Ki sa bann diskisyon pa’n konsern kapasite Msye Victor me plito lo sa kad dan lekel sa anbasader ti pou travay e komite in a linanimite trouve ki sa kad i bezwen ganny eklersi e byen determinen avan sa lapwentman i fer  

- konsernan saler ek depans ki lye avek sa lapwentman, komite in dakor ki  akoz Constitutional Appointment Emolument Act i defini klerman saler, benefis ek pansyon ki en anbasader i gannyen,  sa lapwentman pa pou kapab ganny fer anba Lartik 64(1) Konstitisyon akoz sa i a kapab anmenn konplikasyon legal alavenir

- Komite e bann sekreter prensipal in ansanm  konsider lezot opsyon pour sa lapwentman apard ki anba Lartik 64(1) tel parey en konseye kiltirel dan biro prezidan oubyen en anvwaye spesyal prezidan pour bann misyon spesifik

- komite in ensiste ki alavenir konsiltasyon regilye i ganny fer ant Departman Zafer Etranzer ek IAC a sak fwa ki en lapwentman ki annan konsekans lo bann aktivite diplomatik i ganny fer

- Dan sa lagreman ant Departman Zafer Etranzer ek Lasanble Nasyonal, IAC in deside drafte en lamannman ki i ava prezant avek Departman Zafer Etranzer  

- bann manm IAC e tou lezot dimoun prezan dan sa rankont ti deklare ki zot tou zot ti ava kontan vwar Msye Victor oubyen nenport lezot dimoun alavenir ganny eleve lo en pos enportan ki montre rekonnesans pour son lakonplisman e permet li promot lentere nou pei dan e andeor nou bann frontyer.

IAC in alor agree ki bann sekreter prensipal pou met sa bann propozisyon Lasanble lo sa size devan bann lotorite egzekitif avek bi trouv en solisyon vitman. Le de sekreter prensipal in dakor pour raport progre lo sa size avek IAC osito posib.

More news