Follow us on:

Facebook Twitter LinkedIn YouTube

Domestic

Kominike lapolis |04 March 2021

Sa endividi dan en gran rob pa ganny demande par lapolis

 

Lapolis in raporte ki in etablir idante sa dimoun ki pe marse dan rezyon Mont Fleuri dan en gran rob. Sa personaz ki abiy parey en madanm i annefe en zonm. I osi ganny etablir ki sa endividi pour le moman pa ganny bezwen par lapolis pour okenn lofans kriminel.

Egalman,swivan serten rapor ki i annan dimoun ki pe degiz dan lenz leser pour komet lofans vol dan zanmerant Pointe Au Sel ek Au Cap, lapolis i dir ki i napa rapor formel fer lo sa size ziska prezan. Parkont en rapor fer le 26 Fevriye aswar dan zanmerant Au Cap ti annan lesey vol kot en lakour kot konplenan i dir ki tou lendikasyon ti montre ki enn ant 2 zonm ki ti vin esey vole ti’n abiy dan en rob.

Swivan bann tel rapor lapolis pe demann manm piblik an zeneral pour reste atantif e raport avek kordgard pli pre bann lensidan sispe ki zot obzerve dan zot kominote.

*****

Napa rapor lekor dekonpoze

 

Lapolis in raporte ki ziska ler napa okenn rapor ofisyel ki’n antre kot son 2 stasyon lo Praslin konmkwa i annan en lekor dekonpoze ki’n ganny dekouver lo sa zil, kontrerman avek sirkilasyon en post lo rezo sosyal.

Lanket ki pe ganny fer swivan sa post pa pe montre ki sa ka i vre.

Sepandan, lapolis pe demann nenport endividi ki si zanmen zot annan lenformasyon lo sa size ki zot krwar i kapab kredib pour formelman raporte.

******

Ranforsisman regilasyon kont Covid-19

 

Lapolis in raporte ki avek lentrodiksyon fiks penalti 500 roupi ver konmansman dezyenm semenn Fevriye ziska Dimans le 28 Fevriye en total 299 fiks penalti in ganny servi kont manm piblik ki’n kas bann regilasyon kont Covid-19.

Sa i enkli groupman ilegal, pa met mask, propriyeter biznes ou batiman ki pa’n respekte bann restriksyon lasante piblik etablir an relasyon avek servis ki zot pe ofer osi byen ki kouvrefe/restriksyon lo mouvman parmi lezot.

I enportan note ki parmi sa 299 fiks penalti i annan dimoun ki’n deza fini al pey pour zot.

Lapolis pe averti bann ki pa ankor fer zot peyman pour fer li pli vit posib sinon prosedir pou ganny fer pour zot ka ganny anmenn ankour kot konsekans pou pli grav.

Manm piblik pe egalman ganny fer rapel ki lanmann pour kas regilasyon Covid-19 enpoze par Komisyon Lasante Piblik i kapab ariv ziska 20,000 roupi si ou ganny trouve koupab devan lakour.

Antretan lapolis pe demann tou dimoun pour pran tou prekosyon neseser e demontre plis korperasyon dan lalit pour ede kas lasenn transmisyon Covid-19 dan pei.

 

 

More news