Lazournen Enternasyonal bann Madannm le 8 Mars 2021 |04 March 2021

«Nou bezwen salye bann madanm ki pe fer bann louvraz teknik lo teren akoz san zot nou pou napa en fondasyon»

Alokazyon Lazournen Enternasyonal bann madanm le 8 Mars, Minister Lapes ek Lekonomi Ble an partenarya avek zournal Seychelles NATION, pe servi sa loportinite pour promouvwar bann madanm Seselwa ki pe travay dan sekter lapes ek maritim dan pei.

Dan sa enn lartik nou konn plis lo en lot travayer Lotorite Lapes Sesel (SFA), Manmzel Sharon Roselie, ki en zofisye ‘enforcement’ depi 8-an deza.

Kestyon: Rakont nou enpe lo ou.

Sharon : Mon apel Sharon Roselie, mon reste Mont Buxton e mon annan 26-an. Fransman mon napa gran keksoz pour dir lo mwan, mon pa vwar mwan konman sa dimoun ki sitan enteresan akoz mon enpe rezerve e mon kontan reste kot mwan. Mon plis al travay e mon napa tro sa kote lanmizman.

Kestyon: Ki ou nivo ledikasyon e karyer profesyonnel?

Sharon: Mon’n lekol segonder Belonie apre mon’n al Lekol Maritim kot mon’n fer 2-an dan kour Advanced Certificate in Fisheries Science. Konman mon ti fini Lekol Maritim mon ti konmans rod en louvraz, mon ti anvoy mon laplikasyon kot SFA e enpe letan apre mon ti ganny louvraz kot SFA. Depi ler mon’n fini lekol mon’n travay zis kot SFA e ziska prezan mon pa ankor fer okenn sanzman dan mon karyer. Kot SFA mon ti konmans koman en ‘Assistant Enforcement Officer’ e 5-an apre mon ti ganny en promosyon pour vin en ‘Enforcement Officer’ e ziska prezan mon ankor dan sa pos.

Kestyon: Esplik nou enpe bann responsabilite en Enforcement Officer kot SFA?

Sharon: Nou travay direkteman avek tou keksoz ki annan pour fer avek lalwa ek regilasyon lapes. Nou sirvey tou sa ki annan pour fer avek lapes. Par egzanp, pour banbara, si i annan bato banbara ki antre nou fer bann verifikasyon, nou get son kart, nou gete si tou keksoz i annord. En lot legzanp ler sezon oumar i ouver…nou al pran mezir pour gete si napa bann femel oumar ki annan dizef anba la. Apre i annan bann bato endistriyel ki nou fer compliance lo la, parey i annan sa bann kota ki ti ganny entrodwir pour bann bato endistriyel e purse seiners, nou ale nou verifye zot catch e fer sir ki zot pa’n under declare oubyen esey zwe avek zot kota. Apre osi nou fer lenspeksyon lo bann bato semi-endistriyel bann ki locally flagged. Bann pti bato artizanal, sa nou ale nou tir portre pour nou verifye markings, nou gete si tou keksoz ki annan lo laplikasyon i menm parey avek sa ki nou pe vwar. An zeneral nou fer sir ki bann bato ki pe lapes pe respekte kondisyon ki’n ganny mete dan zot license.

Kestyon: Kwa ki’n fer ou swazir en karyer dan sekter lapes?

Sharon: Mon ti pli enterese avek lasante pour fer nursing. Alors mon’n asize mon’n balans sa de swa ant nursing ek maritim. Mon ti annan sa pasyon pour delo sale me pour mwan vin en ners sa lentere ti enpe pli for. Mon pa konnen ki’n arive ki mon’n ariv kot Lekol Maritim e mon’n pli konfortab laba. Mon ti enpe ezite pour swazir maritim akoz sa bann letan ti annan bokou koze deor e Lekol Maritim ti ganny vwar konman lekol peser, me par kont sa pa ti le ka letan mon ti pe lekol laba. Mon’n aprann bokou keksoz laba e toultan mon’n dir ki Lekol Maritim i pa zanmen fini la akoz lanmer i vas e lapes i kontinyen evolye e se sa ki fer li eksitan, i pa en sekter ki statik.

Kestyon: Ki bann defi ki ou’n fer fas avek e ki ankor pe fer fas avek konman en madanm dan sa kalite travay ki ou pe fer?

Sharon: Letan mon ti konmans travay, ti annan de madanm ki ti pe deza fer sa louvraz e dan en fason zot ti’n fini kre sa lespas pour lezot madanm antre e letan mwan mon’n vini tou keksoz in vin akseptab. Akoz avan ti en landrwa ki ti dominen par bann zonm e tou sa bann madanm in montre ki nou annan potansyel pour kapab fer sa louvraz. Sa i fer ki ler mwan mon’n vini mon pa’n rankontre gran defi me i posib ki bann avan mwan in eksperyanse. Toudmenm i annan sirkonstans kot ou pe travay avek en group dimoun tel konman peser e zot annan en kalite latitid kot zot fason vwar keksoz i enpe diferan e menm par ler ou ganny ‘objectify’. Me mwan mon’n toultan konnen ki mannyer pour dil avek sa bann kalite sitiasyon.

Kestyon: Eski ou krwar i annan egalite dan loportinite pour tou madanm ki travay dan sekter lapes e maritim dan Sesel?

Sharon: Wi i annan. Mon pa konn dan lepase me selman la konmela wi i annan en kantite. Par egzanp kot mwan mon pe travay i en louvraz ki enpe dir me selman nou vwar madanm pe fer li. Vre i annan serten sirkonstans kot madanm pa pou kapab fer akoz petet i demann plis lafors fizik me selman nou vwar bann madanm pe esey fer li. Sans pour plis madanm antre dan sa sekter lapes i annan, i zis ki fodre nou bann zenn ki pe monte i montre lentere dan sa domenn e plis madanm ava kapab zwenn sa sekter.

Kestyon: Ki bann sakrifis personnel e profesyonnel ki ou bezwen fer pour ariv kot ou ete ozordi ?

Sharon: Mon pa’n fer bokou me selman i annan lenstans kot ou bezwen sakrifye ou letan pour ou kapab fer keksoz. Par egzanp sirkonstans kot nou bann madanm nou’n bezwen kit nou lakour pour al lo lanmer pour plis ki 7 zour, parfwa 15 zour, e sa bann letan koumsa ou zis vwar ou tousel konman en madanm akoz ou antoure avek msye e sa i demann bokou. Apard sa mon pans pa si i annan lezot sakrifis ki mon’n bezwen fer akoz mon’n ganny bokou sipor sirtou avek mon paran.

Kestyon: Kote ou vwar ou ankor dan 10-an ?

Sharon: Si bann loportinite i permet petet mon kapab fer en keksoz pour mwan menm me si non mon pou lanmenm kot SFA e mon pou travay dir pour en pos enpe pli o. An zeneral mon pare pour pas mon konnesans avek lezot ki enterese dan sa lendistri akoz pour sa kantite letan ki mwan mon’n la mon’n aprann bokou e mon ankor pe aprann.

Kestyon: Ki mesaz ou annan pour bann madanm ek zenn fiy Seselwa, alokazyon Lazournen Enternasyonal bann Madanm?

Sharon: Pour bann zenn ki pe monte…annou pa per. Lapes i en sekter ki bann madanm pa pe envestir ladan, ki vedir napa bokou madanm ki poprieter bato, nou vwar madanm pe travay dan sa sekter me selman nou pa pe vwar bokou madanm ki annan par dan sa sekter. Si i annan, i tre minim. Kekfwa en zour nou ava vwar bann ki pe leve i ava pli enterese pour vin devan dan biznes. Petet plitar nou ava kapab vwar bann madanm ki annan bato banbara oubyen en madanm ki annan en processing plant. Konmsi mon ti ava kontan vwar en keksoz diferan. Parfwa i annan bokou dimoun ki annan sa persepsyon ki pour ou ganny vwar konman successful dan lavi i vedir ou bezwen dan en pozisyon ansarz me sa pa le ka. Nou bezwen salye bann madanm ki pe fer bann louvraz teknik lo teren akoz san zot, nou pou napa en fondasyon. Sa i vedir ki nou bezwen promouvwar nou bann madanm peser ki lontan ti annan bokou me konmela i vreman rar. Mon le dir avek bann zenn pa bezwen ekout sa ki zot tande e fer sa ki zot lespri i dir zot fer, pa ekout personn, zis fer li.

Sa bann portre ki swiv i montre Sharon an aksyon dan son travay.

En kontribisyon Minister Lapes ek Lekonomi Ble