Follow us on:

Facebook Twitter LinkedIn YouTube

Education

Preparasyon pour larantre etidyan dan bann sant profesyonnel ek SALS |04 March 2021

Swivan kominike ki Minister Ledikasyon ti fer le 18 Fevriye konsernan rezilta laplikasyon avek ladmisyon pour sant profesyonnel ek Lekol Letid Avanse 2020, Minister Ledikasyon i oule enform tou paran ek manm piblik ki sa premye faz in konplete.

Minister pe aprezan bouz dan dezyenm faz preparasyon pour larantre etidyan premye lannen dan bann sant profesyonnel ek Seychelles Advanced Level Studies (Sals). Sa i pour bann etidyan S5 ek ‘Mature Applicants’ ki’n reisi.

Diferan sesyon in ganny organize par bann sant profesyonnel. Seychelles Business Studies Academy (SBSA) i konmans zot sesyon ozordi (Zedi le 4 Mars) apartir 9er bomaten pour bann etidyan ki pou fer diplonm dan management ek ladministrasyon biznes. Bann ki pou fer diplonm dan finans ek kontabilite, sesyon pou konmans apartir 1er apremidi ozordi menm. Tou sa bann sesyon pou fer dan oditoryonm Liniversite Sesel Anse Royale.

Sesyon pour bann lezot kour pou fer demen bomaten (Vandredi le 5 Mars) menm landrwa apartir 10er edmi bomaten.

Bann etidyan Praslin ek La Digue ki pa’n kapab vini yer, zot ganny demande pour raporte pour sesyon demen, Vandredi le 5 Mars.

National Institute of Health and Social Studies (NIHSS) li i pou konmans son bann sesyon pour tou bann kour diploma apartir demen 9er bomaten kot sa lenstiti North East Point. Tou bann lezot sant profesyonnel pou konmans zot bann sesyon apartir Lendi le 8 Mars.  

Pour plis detay lo lorganizasyon sa bann sesyon, etidyan oubyen paran i ganny demande pour pran kontakt avek bann lenstitisyon respektiv kot zanfan in ganny aksepte pour plis detay lo kan ek ler ki bann sesyon pou ganny fer. Lenformasyon pe osi ganny pase par diferan platform tel ki radio, televizyon, Facebook osi byen ki lo sit web Minister Ledikasyon.

Minister i oule remersye tou paran, etidyan ek manm piblik an zeneral pour zot konprenezon ek korperasyon.

 

Kominike sorti kot Minister Ledikasyon

                                                                                                                       

 

More news