Profil childminder |22 July 2019
Marie-France Leon
Marie-France Leon : «Ler ou avek bann zanfan ou napa sa traka parey ler ou pe travay avek adilt»
Limenm en manman 4 zanfan, Marie-France i dir ki i kontan zanfan e se sa enn bann rezon akoz in konmans vey zanfan konman en metye.
Napa bokou letan depi ki i en childminder, me san dout son leksperyans konman en manman i donn li bokou bagaz ki ed li okip zanfan lezot osi byen ki sa ki pour li.
Vi ki i ti pe okip 9 zanfan ler nou ti pase, i byen sir travay avek en asistan selon bann demann standar nasyonal, ki presize ki en childminder i merit annan en asistan si i pe vey 6 zanfan anmontan.
Kot Marie-France zanfan i annan en lasanm pour zot menm kot zot kapab zwe an sekirite. I annan son pti lasanmben ki konnekte lanmenm e sa i fasilit louvraz Marie-France ler i bezwen benny zot oubyen sanz zot napi.
Pandan lazournen pour egey zot, zot zwe lego oubyen zot zwe deor ; ler letan i bon Marie-France i gonfle en swimming pool pour zot e parfwa bann ki pli gran i osi kapab sey rey lo papye an preparasyon pour lakres.
Bann zanfan ki Marie-France i veye zot apel li par son non. «Mon’n sey tou pour fer zot apel mwan auntie, tantin, oubyen madanm, zot pa oule. Tou dimoun ki vin la i en auntie, en tonton, mwan Marie-France menm. Mon krwar akoz zot tann dimoun apel mwan koumsa alors zot osi zot adopte koumsanmenm.»
Marie-France i dir ki zot bann bon zanfan malgre sa pti or-norm e zot konport zot byen.
Nou ti anvi konn bann defi ki i’n fer fas avek depi ki i’n konmans prosedir lanrezistreman ziska la e i dir nou ki i pa’n fasil pour li ; i’n bezwen fer serten lazistaz avek son lakaz pour fer zanfan pli konfortab e pli an sekirite ; i’n bezwen konstrir sa lasanm kot zanfan i zwe e osi met tiles kot lezot landrwa ki zanfan i ganny akse avek.
I dir ki konmela i annan serten paran ki tarde peye e serten ki pa dir si zot pe kit zanfan avek zot akoz zot pe pran en zour off, e sa i afekte son planifikasyon kotidyen. Me i esey edik zot kimannyer i kapab pour ki zot kapab travay ansanm dan lentere bann zanfan.
Marie-France i telman kontan travay avek zanfan ki i dir ki si i ti annan landrwa i ti pou fer en daycare e i anvizaze kontinyen vey zot ziska son laz retret.
“Ler ou avek bann zanfan ou napa sa traka parey ler ou pe travay avek adilt ; zanfan sa ki zot in dir ou se sanmenm, zis fodre ou konpran sa ki annan son kapris. I gou get zot. La mon annan ki ler zot pe sante zot konpoz anmenmtan, enn ler zis mon riye avek zot.»
I dir ki i apresye bann kour ki IECD i ofer, ki zot ed li bokou dan son travay. I swete ki ti ava annan lezot kalite osi, tel parey kimannyer pour relax e kimannyer pour pli byen koriz zanfan ler zot fer en keksoz ki pa apropriye. I ankouraz lezot dimoun pour pran sa travay konman zot metye ; i dir ki zot pou benefisye bokou e zot osi ganny sipor lezot childminders.
En kontribisyon IECD