Follow us on:

Facebook Twitter LinkedIn YouTube

Domestic

Zabitan Port Glaud i eksprim mekontantman anver bann proze ki pe propoze pour Cap Ternay |22 July 2019

Zabitan Port Glaud i eksprim mekontantman anver bann proze ki pe propoze pour Cap Ternay

En group zabitan Port Glaud in eksprim zot mekontantman anver bann proze ki pe propoze dan kad redevlopman Cap Ternay e sa i en vilaz reabilitasyon bann adik drog, en sant rezidansyel pour bann zenn avek problenm konportman e en fasilite pour Lazans Transpor lo Later.

En rankont konsiltativ piblik ti’n organize Sanmdi apremidi dan sant kominoter Port Glaud pour donn bann zabitan lenformasyon lo sa bann proze ki pe ganny propoze e travay ek konsiltayon preliminer ki pe fer.

Ti osi lokazyon pour ganny pwenndvi, propozisyon ek konsern bann zabitan lo sa bann proze.

Prezan pour donn lenformasyon lo sa bann proze ti Nanette Laure, zofisye lanvironman konsernen ek ranforsman bann regilasyon proteksyon lanvironnman ek Nimham Senaratne, konsiltan enzenyer responsab bann size letid lenpakt lo lanvironnman.

Malerezman sa rankont ti mal tournen akoz sa group zabitan pa ti oule antann nanryen pour fer avek sa trwa proze e zot pa ti anvi ekout okenn leksplikasyon ki bann zofisye konsernen ti’n vini pour partaz avek zot.

Zot bann konsern ti lo size later kot sa bann proze pe propoze pour fer.

“Gouvernman pa kapab vin propoz okenn proze letan i konnen sa later i ankor pour bann zeritye ki ziska aprezan pa ankor ariv lo okenn konpromi lo size zot bann later dan sa rezyon,” en msye ti dir.

Aparti dela tou bann zabitan dan lasal ki ti annan later dan sa rezyon oubyen zot fanmir ki ti annan later oubyen ki ti konn zeritye sa bann later ti debout e ti konmans eksprim zot mekontantman lo fason sa bann proze ti’n ganny deside san gran konsiltasyon avek zabitan.

Enn parmi bann zabitan ti dir in annan serten koze o size bann propriyete enpe letan pase me nanryen pa ti ankor ganny agree e zot ti krwar zot ti pe al ganny serten larepons dan sa miting.

En zofisye Minister Later ti fer konpran bann zabitan ki lenformasyon ki i annan sa later i pour gouvernman e ki napa okenn lezot larepons apard sa e sa ti fer sa bann zabitan pli ankoler.

Apard sa size later ki pa kler, bann zabitan ti osi dir ki vi ki Port Glaud i annan bokou problenm drog kot serten zabitan nepli konnen ki pou fer vi ki zot ganny vole tou zot keksoz e zot pa kapab plant nanryen kot zot, zot pa anvi en proze ki annan pour fer avek drog e osi bann zanfan move konportman vin azout lo problenm zot distrik.

“I annan plizyer lezot distrik e Sesel i annan 115 zil akoz fodre absoliman Cap Ternay? Bokou nou zabitan isi pe rod landrwa pour fer lakaz ek biznes. Akoz pa servi sa later pour fer lakaz pour nou dimoun? Akoz pa fer devlopman ekonomik pour benefisye nou distrik? Cap Ternay i en landrwa ouver kot bokou bato i koste eski i fer sans pour annan en vilaz pour reabilit adik isi anler? Nou pa oule bann tel proze koumsa nou,” en lot zabitan ti dir avek laplodisman dan lasal.

Size semen dan sa landrwa ki etrwat ti osi en pwen konsern ki ti leve me apre en ventenn minit kot zis bann zabitan dan lasal ki ti pe koze zot tou ansanm, miting ti bezwen kennsel akoz dimoun ti pe leve e personn pa ti pare pour ekout bann zofisye ki ti’n vini pour anmenn bann lenformasyon lo sa bann proze.

Madanm Laure ek Msye Senaratne i dir i regretab sa ki’n arive me zot pou bezwen aprezan al kot Minister Later ek lezot lotorite konsernen pour demann zot pour etabli klerman pour ki sa bann later e trouv en konpromi avek bann zabitan lo sa size avan ki zot agree ki prosen letap.

Fodre dir ki sekreter deta pour reabilitasyon drog Dr Patrick Herminie, sekreter prensipal pour zafer sosyal osi byen ki plizyer o zofisye Minister Ledikasyon e plizyer manman ki zot zanfan pe abiz drog ti’n osi vin asiste sa rankont.

Apard administrater sa distrik, Leonne Florentine, MNA pa ti prezan me Madanm Florentine in fer nou konpran ki sa bann zabitan in deza konmans serten prosedir devan Lakour konsernan sa zafer later.

More news