Follow us on:

Facebook Twitter LinkedIn YouTube

Entertainment

Mahé Chamber Choir i selebre son 15enm lanniverser avek pyes ‘Zalouzi Mouswar’ | 27 July 2019

Pour selebre son 15enm lanniverser, Mahé Chamber Choir pe met ansenn son senkyenm pyes mizikal ‘Zalouzi Mouswar’, ki ti montre pour premye fwa yer swar dan Sant Konferans Enternasyonal (ICCS).

Sa pyes mizikal, baze lo Othello ki ti gany ekrir par William Shakespeare an 1603, i rakont zistwar en zeneral militer ki swazir pour donn promosyon en lot zofisye olye ki sa dimoun ki son asistan de pre, e sa i deklans en seri lemosyon ki enkli laraz, zalouzi ek revanz. Alors, sa karakter, Iago, ki ganny zwe par Xavier Bernard Shamlaye, i deside pour li anpwazonn lespri e trair li ziska ki sa morso i termin dan en trazedi kot en kantite dimoun i perdi zot lavi.

Bann akter prensipal sa pyes mizikal i enkli Roveson Pillay konman Thierno, sa zeneral militer, Gretel Isaac konman Bianca osi byen ki Amy Gomme dan rol Dessie, madanm Thierno.

Dapre en teaser lo platform medya sosyal Mahé Chamber Choir, in pran apepre 6 mwan edmi pour fondater sa group, Raymond Clarisse, tradwir sa pyes, konpoz bann morso mizikal e adapte li pour reflekte en pti pe konteks lokal.

Msye Clarisse i dir ki lodyans i kapab ekspekte vwar en pyes tre o nivo e enn ki konplet malgre lefe ki sa pyes pa sitan fasil pour rakonte e reprodwir. I osi azoute ki i demontre matirite sa group ki ti met ansenn son premye pyes, ‘Kastor Nesans en Pep’ 10-an pase an 2009.

Sa pyes pou zwe ankor ICCS tanto.

 

Laura Pillay

More news