|

Mon’n remarke ki dan lapres – ki swa radyo, televizyon oubyen Nasyon – zot annan preferans pour serten klib foubol.

Tou dernyenman avek sezon foutbol ki’n fermen, mon’n vwar ki i’n annan tim foutbol ki fer tre byen e menm fer double. Zis en serten bann ki’n ganny piblisite dan nouvel ek magazin sport e dan Nasyon tandi ki i annan tim ki’n fer double, ni filmen, ni donn rezilta, ni lo Nasyon napa nanryen.

Mon pe koz lo tim St John Bosco ki li osi in fer double dan trwazyenm divizyon. Dan son dernyen zwe pour lakoup ‘Knock Out’ trwazyenm divizyon, i ti bat Mont Fleuri e nanryen nou pa’n tande. Akoz?

Tim St Francis ek St Michel i’n fer double, sa mon pa konnen konbyen fwa ou’n tande.
Mon pe demann bann zournalis sport pour aret annan preferans zis pour en bann serten tim. Tret tou tim parey. Si zot pa’n kapab filmen, omwen donn rezilta dan nouvel sport oubyen dan Nasyon.

Zot prefere fer bokou piblisite lo bann sport enternasyonal.
Sa i’n afekte enpe bann zwer ek siporter sa tim akoz zot ti anvi tande ki zot osi zot i’n fer double.

Mon espere ki bann zournalis sport a konpran mwan e mon mazinen ki i annan lezot dimoun ki mazin parey mwan.
Mersi bokou.

Marjorie Florentine