Dife i detri en stor ek parti en lakaz Belvedere |27 September 2013

Dife in konpletman detri en stor osi byen ki twatir e plafon en lakaz 2 lasanm anviron 1 met pli lwen anler Belvedere par lao kot bis i vire.

Personn pa’n ganny dimal dan sa lensidan ki ti ariv yer bomaten.

Sel dimoun ki dapre lenformasyon ti pe reste dan sa lakaz,  Madanm Jona Furlanetto, pa ti la ler dife ti deklare.

Lakoz sa dife pa kler e lapolis ek Lazans Servis Tenny Dife ek Sovtaz pe kontiny zot lanket dan sa lensidan.

Dapre portparol Lazans Servis Tenny Dife ek Sovtaz, Msye Jones Madeleine, ti ver 9er42 bomaten ki zot ti ganny enformen lo sa dife e la zot ti deplway 3 masin enkli zot bowser e ti pran zot en dizenn minit pour tenny sa dife.

Msye Madeleine i dir sa stor ek sa lakaz ti partaz en sel twatir e ler zot ti arive sa stor ti anflanm e dife ti’n fini propaz dan twatir sa lakaz obor.

I ti dir menm si miray sa lakaz i ankor debout in ganny afekte avek lasaler entans sa dife.