Zanfan lekol Primer Baie Lazare i promet pour zer byen salte |02 September 2004

Apartir trimes prosen, bann zanfan pou bezwen klasifye tou salte. Sa i vedir ki dan sak laklas pou annan trwa bin -- enn pour salte plastik, lot pour salte ki pouri e en lot pour papye.

Sa bann zanfan ti fer sa promes dan en seri aktivite organize par ladministrasyon sa lekol pour sansibiliz zot lo lenportans annan en lanvironnman prop e zoli. Sa aktivite ti pran plas lavey ki bann zanfan ti pe al rantre dan vakans Out.

Dan sa menm laliny bann zanfan, paran ek ansennyan ti osi plant plizyer plan fler ek pye palm dan zalantour sa lekol. Sa bann plant i en donasyon fer par Minister Lanvironnman ek Resours Natirel.

Avan komans anbelir zot lekol avek sa bann zoli plant, bann zanfan ti fer plizyer prezantasyon poenm, sanson ek pyes teat ki ti ranpli avek mesaz lo meyer fason pour gard lanvironnman prop tel parey koman pour protez larivyer.

Jeanette Larue, Kordinater Ledikasyon Lanvironnman dan Minister Ledikasyon ek Lazenes, ki ti osi prezan kot sa aktivite, ti annan mo felisitasyon pour sa lekol, ki’n pran linisyativ pour plant sa bann plant e osi lans sa nouvo proze.

Letan i ti pe demann bann zanfan pour respekte sa bann plant, Madanm Larue ti eksplik benefis ki plant i annan pour lanvironnman e osi benefis lo lasante.

Miss Marguerite Belle, direktris lekol, ti annan mo remersiman pour tou bann dimoun ki’n ede pour fer sa lazournen en sikse. I ti osi fer bann zanfan mazin lenportans plant pye dibwa e demann zot pour fer sa proze klasifye salte en sikse.