Per Gappy i dir 'Atrap Mon Lanmen' |20 November 2004

 
Alor se pour sa rezon ki in deside fer sorti en nouvo albonm avek tit Atrap Mon Lanmen, atraver ki i oule pas plizyer mesaz spirityel pour bann zanfan ek adolesan.

Parey avek son bann albonm ki in deza fer sorti kot Per Gappy i toultan envit en lot santer ou group pour sant avek li, safwasi in ganny lasistans group Pastoral Zanfan ek Pastoral Adolesan.

Sa albonm, ki konpri 7 sanson ek 2 kont animen par bann zanfan sa de group, i koz lo lavi bann zanfan, zot difikilte e ki mannyer zot kapab ganny sove si selman zot annan lafwa.

Come On, Bartime, Pran, Get Sa Madanm, Ki Zot pe Dir, Shana i serten bann sanson lo sa albonm.

"Shana par egzanp i koz lo en zanfan ki pa konn son papa e Zezi i dir li ki Bondye i son papa ki kontan li e i touzour avek li. Mon'n osi servi langaz ki bann zenn i koze atraver sanson Ki Zot pe Dir. I annan en nesesite pour nou bann adilt ekout sa ki bann zenn pe dir," Per Gappy ti dir.

Sa CD i annan en varyete stil lanmizik tel ki zouk, sega ek slow.

Per Gappy ti osi azoute ki i ganny enspire par bann parol levanzil.

Tou parol sanson in ganny ekrir par Per Gappy e laranzman mizikal i travay Daniel Elizabeth. Lanrezistreman in ganny fer par Daniel Elizabeth ek Dominic Cetoupe.

Atrap Mon Lanmen i kout R75 e i deza anvant dan bann laboutik dan Lari Bazar e osi apre lanmes kot Katedral.