3 peser i ganny atrape pe lapes dan park maren |03 February 2005

Sa lotorite in lans sa lapel apre ki kat Marine Park rangers ti aret trwa peser ki ti dan en bato mini-mae pe lapes pwason, sirtou makro, dan park maren Ste Anne Merkredi 2 Fevriye bomaten.

Dapre enn sa bann rangers, Joachim Edmond, zot ti pe fer zot tyek normal dan zalantour zil Ste Anne Merkredi ver 7.30 bomaten ler zot ti vwar sa bato pe lev lasenn zis an deor Anse Cimetière.

Deswit zot ti apros sa bato e fer zot konnen ki zot ti pe fer pratik ilegal dan park maren e la bann rangers ti trenn sa mini-mae ziska kot baz Gard Lakot.

I ti dir ki si bann peser ek lezot dimoun i kontinyen lapes dan bann park maren, pou annan en lefe negativ lo to reprodiksyon bann pwason ek lezot lespes sou-maren e an rezilta sa en bes dan lakantite pwason dan sa landrwa proteze.

Msye Edmond ti dir ki sa trwa peser pa’n obzekte zot direktiv e zot ti korpere.

Sa i premye lensidan parey ki ganny raporte pour sa lannen e dapre Nigel Hoareau, en zofisye sinyor avek Lotorite Park Maren, i en lofans anba National Park Act pour lapes oubyen lev kazye dan park maren.

Msye Hoareau in osi dir ki pandan sa letan ti osi annan en yot dan zalantour ki’n donn serten lenformasyon an koneksyon avek sa lensidan.

Sa 3 zonm ti ganny met dan lanmen lapolis e sa bann pwason ki'n ganny sezi pou servi konman egzibit.
Antretan lapolis in dir ki en lanket in ouver e sa trwa zonm in ganny large lo bel.