Lasemenn bann moniman ek bann sit istorik, le 18 ziska 24 Avril-Leritaz Nasyonal i remet lavwar ek kominote Bel Air |22 April 2005

Sa zes senbolik ti deroul dan distrik limenm, kot direkter zeneral pou Leritaz Nasyonal, Madanm Marie-France MacGregor, ti prezant en valv avek ladministrater distrik Bel Air, Madanm Antoinette Bonne.

Sa seremoni ti swiv par en pti demonstrasyon par de zabitan sa distrik lo ki mannyer nou zanset ti servi en tel fasilite dan sa lepok.

Lavwar ti ganny konstri an 1910  pou deservi bann pasyan kot en maternite ziska 1924 ler i ti fermen. Me bann zabitan sa distrik ti kontinnyen servi sa pandan en serten letan. Travay reparasyon lo sa lavwar ti komanse lannen pase.

Osi prezan kot sa pti levennman ti sekreter prensipal pou Kiltir ek Spor, Msye Patrick Nanty, manm lasanble nasyonal pou distrik Bel Air, Msye Alain St Ange, sekreter komite nasyonal bann moniman, Msye Gabriel Essack, ek lezot envite.

Apre bann envite ti rann en vizit simityer Bel Air pou al vwar proze restorasyon lo bann latonm abandonnen ki anba reparasyon anba.
Dapre Msye Essack, reparasyon lo sa bann latonm pe ganny fer ek bann materyo parey laso, later rouz, koray ek siman.

I ti dir ki zot bezwen mentenir sa simityer anvi ki i en sit istorik e ki i a kapab vin en latraksyon touristik pli atiran dan le fitir.