Fred Savy i lans son premye CD |06 August 2005

Me safwasi, Fred Savy – byen sir se li sa mizisyen ki nou pe fer referans avek – in deside  lans son prop travay atraver en premye CD avek tit Depi ki nou’n zwenn.

Sa CD ki konpri 10 sanson, parmi Lafreyer mon bann rev, Lo sa later, Retourn kot mwan e In anvi ale, i deza anvant dan bann laboutik dan Lari Bazar e osi lo Praslin.

Sa CD i kout R125 me bann ki aste en kopi avek Fred an personn pou kapab pey selman R100.
Fred, ki ti montre lentere pour lanmizik letan i ti annan 17 an, in dir ki in pran en an pour konplet Depi ki nou’n zwenn ki konpri sanson avek en varyete stil parey reggae, slow, sega, zouk ek ragga.

“Letan ou pe viv ou pas atraver bokou keksoz, sa ki bon ek sa ki move e se sa ki mon’n enterprete atraver mon bann sanson,” Fred ti azoute.

Fred in osi ganny lasistans son fiy 14 an – Emmylyn Savy – pour ekrir bann sanson lo sa CD e se bann mizisyen parey Peter Jules (keyboard), Bruce Freminot (tanbour ek perkisyon), Danny Jules (gitar), Cyril Vital (gitar lid) ki’n ed li avek bann laranzman mizikal.

Backing vocals in ganny fer par Michel Marengo ek Sushine.

“Mon annan lide fer detrwa spektak pour promot mon CD me sa pou depan lo lavant,” Fred ti dir.