SWAC pe demann manm piblik pour depoz byen bann retay pwason |11 April 2006

Dapre sef Task Force SWAC, Barry Joseph, i ti ganny en kou-d-telefonn yer par en rezidan Beau Bel pour enform li ki in dekouver plizyer retay pwason ki’n ganny zete dan sa landrwa.

Swivan sa, i ti dir, i ti mobiliz en lekip ver sa landrwa kot zot ti vwar anviron en senkantenn retay bourzwa ek zob.

"Sa kantite retay pwason i fer mwan kwar ki zot sorti kot en lotel. Petet en dimoun in ganny kontra pour al zet sa bann retay pwason e olye al zet zot dan landrwa apropriye zot in plito fer li la ki pli pre," Msye Joseph ti dir.

I ti azoute ki lefe ki napa ase levidans pour fer en case, sel keksoz ki zot ti kapab fer se ranmas sa bann retay pwason e al zet zot dan landrwa apropriye Providence.

Msye Joseph, ki ti osi fer remarke ki resaman in annan en logmantasyon dan sa kalite aktivite malapropo, in dir ki zot ankor pe kontinyen avek lanket dan en lot ka kot en serten kantite makro mor ti ganny trouve dan marina kot Wharf Hotel resaman.