Minis Faure i vizit zelev lo kan vakans |26 April 2006

Minis Faure, ki ti dekrir sa vizit koman en moman pour li personnelman zwenn bann zanfan e aprann enpe plis lo bann divers aktivite ki zot fer dan kan, ti dir ki bann animater ek animatris in byen organiz progranm aktivite.

I ti fer resorti ki kan vakans pour zelev P6 ti ganny entrodwir 5-an pase avek bi permet bann zelev fer lanmitye e aprann viv pli byen ansanm, vi ki bokou zot pou rankontre kanmarad dan lekol segonder.

Pandan son vizit, ki trwazyenm depi ki sa progranm vakans in demare, Minis Faure ti osi ganny sans war bann zanfan pe fer divers aktivite tel parey lav zot lenz e osi koz ek zot lo bann aktivite ki zot in fer pandan zot premye zour lo kan.

Sa bann zelev ti fer resorti ki zot pe pas en bon moman ek kanmarad e ki zot in ganny sans al hike dan bann landrwa ki zot pa’n deza vizite avan tel parey Anse Majore, Anse Du Riz, al kot Ros Kopra e osi al bennyen dan kaskad (waterfall) Port Glaud.

Zot ti osi koz lo bann aktivite sportif ki zot in partisip ladan parey basketball, parmi lezot.

Minis Faure, ki ti akonpannyen par lezot zofisye departman ledikasyon, ti osi ganny sans koz ek serten animater dan prezans kordinater progranm kan vakans, Paul Denis.