Selebrasyon Lendepandans-Repetisyon flot karnaval Dimans |10 June 2006

Bann manm komite organizater sa aktivite, ki pe ganny organize pour konmemor 30enm lanniverser Lendepandans Seychelles, ti zwenn Vandredi 9 Zen kot Teat Nasyonal Mont Fleuri avek reprezantan bann partisipan ki pou mont zot prop flot dan sa karnaval. Sa karnaval limenm pou deroul Sanmdi le 1er Zilyet apartir 5er apremidi dan Lavil Victoria.

Pandan sa rankont Vandredi, ki ti dirize par msye Patrick Andre ki responsab komite organizater e msye John Etienne, ki direkter koreografi pour sa karnaval, bann reprezantan ti diskit plizyer pwen parey sekirite e konminikasyon ki annan pour fer avek modalite sa aktivite limenm e fason ki i pou ganny kordinen.

Fason ki lenstriksyon pou ganny donnen, rol bann endividi ki pou diriz flot, pozisyonnman lafoul, vites avek ki flot pou deroule, i parmi bann pwen teknik ki pou ganny teste pandan repetisyon Dimans.

Sa repetisyon pou vwar partisipasyon selman enn de flot ki pou partisip dan sa karnaval.