Kominike Lapolis-Dife i detri en lakaz Lari Hangard |25 October 2006

Dife in konpletman detri en lakaz 4 lasanm Lari Hangard.

Sa lakaz, ki ti pou msye Leon Cadeau avek son fanmiy, ti'n konstri an tol, plywood ek mezonnayt.

Sa lensidan ti ariv ver 7er diswar Lendi.

Lapolis in konmans lanket pour determin sirkonstans ek lakoz sa lensidan.

Lanmor Ernest Benoit
Lapolis i kestyonn de drayver bis

Lapolis in aret e kestyonn 2 drayver bis an relasyon avek sa lensidan kot en zonm 44- an, Ernest Benoit ki ti pe reste Dame le Roi, in perdi son lavi.

Benoit, ki ti ganny trouve san konnesans kot car park dan zanmerant Biro Ladministrasyon Baie Lazare Dimans swar, ti plitar ganny deklare mor an arivan lopital Anse Royale.

Lanket pe kontinyen dan sa zafer.

En zonm i mor lopital apre ki in tonbe sorti dan en transpor

Lapolis in ouver lanket dan en lot lensidan trazik, kot en zonm in mor apre ki in ganny raporte tonbe sorti dan en transpor.

Sa lensidan ti ariv lo Lari Albert vizavi Deepam Cinema enpe letan avan midi yer.

Sa zonm, ki'n ganny idantifye konman Noel Ernesta, aze 49-an e ki ti pe reste Pointe Au Sel, ti mor lopital Victoria kot i ti'n ganny refer sorti klinik Riviere Anglaise.