Roger Pothin i met son bann fàn dan lanbyans Nwel ek Lannen boner |25 November 2006

Sa albonm pe vann selman 100 roupi dan bann landrwa labitid e avek Roger limenm.

Roger in dir ki sa CD, ki’n pran li anviron 6 mwan pour travay lo la, in ganny fer a la demann son bann fàn.

Roger ti fer remarke ki sa 9 sanson lo sa CD i son prop konpozisyon e tou bann laranzman lanmizik in ganny fer par limenm an kolaborasyon avek group mizisyen Island Boys ki’n akonpanny li.

Dan son konversasyon avek Nasyon, Roger ti dir ki bann sanson i pour tou gou e tou laz e ki i asire ki sa bann ritm popiler pou sirman fer tou sa ki ekoute antre dan sa bon lanbyans sa 2 gran lafet ki pe vini byento.

Bann diferan tit byen enteresan lo sa CD i enkli Bonnonm Lannen, Sega Bonn Ane, Moutya Bonn Ane, parmi lezot .

Roger, ki byen koni pour son bann divertisman ki i donnen dan bann lotel lo Praslin, La Digue e Mahe, i oule fer konnen son bann fàn ki fodre pa mank sa enn albonm dan zot koleksyon sirtou pour bann parti ek lezot rankont sosyal ki zot pou fer pour sa 2 gran lafet.