Konsey Paran Edikater i fer son 7enm rankont anyel |22 January 2007

Sa rankont, ki ti deroul dan Sant Konferans Enternasyonal, ti ofisyelman ouver par Minis pour Ledikasyon, Bernard Shamlaye, ki osi nouvo tyermenn sa Konsey.

Sa lasanble ti regroup bann zofisye dan Minister Ledikasyon, direkter e direktris lekol, ansennyan ek bann tyermenn Lasosiasyon Paran Ansennyan (PTA).

Dan son ladres, Minis Shamlaye ti koz lo bann diferan lakonsplisman ki son minister in fer lannen pase an relasyon ek bann konsern ek sizesyon ki bann paran ti met devan.

I ti dir ki Kod Kondwit (Code of Conduct) pour bann lekol in ganny revize, ki son minister in fer plis lenvestisman pour fourni lekol ek bann resours neseser, e ki Minister Ledikasyon in organize pour ki bann zanfan i kapab reste apre ler lekol e ganny led ek zot homework annatandan zot paran.

Minis Shamlaye ti dir ki, “tou sa i montre ki i enportan pour paran kontribye zot lide pour nou toultan kapab amelyore”.

Dapre Minis Shamlaye, sa lannen plis lanfaz pou ganny mete lo ledikasyon de kalite a tou nivo. I ti osi dir ki “Valer” pou ganny vwar koman en size primordial.

Minis Shamalaye ti fer resorti ki son minister i bezwen sipor bann paran pour arive akonplir tou sa bann lobzektif.

Dapre Minis Shamlaye, ledikasyon “Valer” i enkli lasante zanfan, osi byen ki fason pour ed zot pour evit bann aksyon negativ tel ki labi drog ek lakol parmi lezot. E se zisteman dan sa loptik ki trwa komite ti formen lannen pase pour target sa bann size.

Sa trwa komite, ki tonm anba parasol Pec, i enkli Komite pour Promotion ek Sipor pour PTA; Komite pour Promosyon Lasante; e Komite pour Sipor Paran.

Sekreter Prensipal pour Ledikasyon, Jeanne Simeon, ki osi vis-tyermenn Pec, ti a son tour donn en pe bann detay lo en rankont bann Minis Ledikasyon sorti dan bann pei Commonwealth ki ti fer Sid Afrik ant le 11 ek le 14 Desanm lannen pase.

Pour ilistre bann pwen ki ti pe ganny fer resorti, bann partisipan ti ganny sans vwar en film baze lo bann defi dan ledikasyon ki bann pei Commonwealth pe fer fas avek.
Sa film ti ganny montre dan sa rankont an Sid Afrik.

Pandan rankont Pec Sanmdi bann manm ti osi ekout rapor anyel sa Konsey pour lannen 2006 prezante par Sekreter Pec, Christian Cafrine.
Msye Cafrine ti koz lo bann sanzman ki’n arive dan Pec swivan sanzman dan minister limenm ver milye lannen pase.

Msye Cafrine ti osi donn en revi bann diferan aktivite ki Pec ti organize e i ti donn en previ bann aktivite pour sa lannen, sirtou Lasemenn Pec ki pou deroul an Zilyet.

Dan son rapor, trezorye Margaret Hoareau ti donn en kont randi lo kote finansyel sa Konsey.